Zabūr 103
rabb kī shafqat kī sitāish
1dāūd kā zabūr.
ai merī jān, rabb kī sitāish kar! merā rag-o-reshā us ke quddūs nām kī hamd kare!
2ai merī jān, rabb kī sitāish kar aur jo kuchh us ne tere liye kiyā hai use bhūl na jā.
3kyūṅki vah tere tamām gunāhoṅ ko muāf kartā, tujhe tamām bīmāriyoṅ se shifā detā hai.
4vah ivzānā de kar terī jān ko maut ke gaṛhe se chhuṛā letā, tere sar ko apnī shafqat aur rahamat ke tāj se ārāstā kartā hai.
5vah terī zindagī ko acchhī chīzoṅ se ser kartā hai, aur tū dubārā javān ho kar uqāb kī sī taqviyat pātā hai.
6rabb tamām mazlūmoṅ ke liye rāstī aur insāf qāim kartā hai.
7us ne apnī rāheṅ mūsā par aur apne azīm kām isrāīliyoṅ par zāhir kie.
8rabb rahīm aur meharbān hai, vah tahammul aur shafqat se bharpūr hai.
9na vah hameshā ḍāṅṭtā rahegā, na abad tak nārāz rahegā.
10na vah hamārī ḵẖatāoṅ ke mutābiq sazā detā, na hamāre gunāhoṅ kā munāsib ajr detā hai.
11kyūṅki jitnā buland āsmān hai, utnī hī azīm us kī shafqat un par hai jo us kā ḵẖauf mānte haiṅ.
12jitnī dūr mashriq maġrib se hai utnā hī us ne hamāre qusūr ham se dūr kar die haiṅ.
13jis tarah bāp apne bacchoṅ par taras khātā hai usī tarah rabb un par taras khātā hai jo us kā ḵẖauf mānte haiṅ.
14kyūṅki vah hamārī sāḵẖt jāntā hai, use yād hai ki ham ḵẖāk hī haiṅ.
15insān ke din ghās kī mānind haiṅ, aur vah jaṅglī phūl kī tarah hī phaltā phūltā hai.
16jab us par se havā guzre to vah nahīṅ rahatā, aur us ke nām-o-nishān kā bhī patā nahīṅ chaltā.
17lekin jo rabb kā ḵẖauf māneṅ un par vah hameshā tak meharbānī karegā, vah apnī rāstī un ke potoṅ aur navāsoṅ par bhī zāhir karegā.
18shart yah hai ki vah us ke ahd ke mutābiq zindagī guzāreṅ aur dhyān se us ke ahkām par amal kareṅ.
19rabb ne āsmān par apnā taḵẖt qāim kiyā hai, aur us kī bādshāhī sab par hukūmat kartī hai.
20ai rabb ke farishto, us ke tāqatvar sūrmāo, jo us ke farmān pūre karte ho tāki us kā kalām mānā jāe, rabb kī sitāish karo!
21ai tamām lashkro, tum sab jo us ke ḵẖādim ho aur us kī marzī pūrī karte ho, rabb kī sitāish karo!
22tum sab jinheṅ us ne banāyā, rabb kī sitāish karo! us kī saltanat kī har jagah par us kī tamjīd karo. ai merī jān, rabb kī sitāish kar