Zabūr 105

¹rabb kā shukr karo aur us kā nām pukāro! aqvām meṅ us ke kāmoṅ kā elān karo.

²sāz bajā kar us kī madahsarāī karo. us ke tamām ajāib ke bāre meṅ logoṅ ko batāo.

³us ke muqaddas nām par faḵẖar karo. rabb ke tālib dil se ḵẖush hoṅ.

⁴rabb aur us kī qudrat kī darayāft karo, har vaqt us ke chihare ke tālib raho.

⁵jo mojize us ne kie unheṅ yād karo. us ke ilāhī nishān aur us ke muṅh ke faisle duharāte raho.

⁶tum jo us ke ḵẖādim ibrāhīm kī aulād aur yāqūb ke farzand ho, jo us ke barguzīdā log ho, tumheṅ sab kuchh yād rahe!

⁷vahī rabb hamārā ḵẖudā hai, vahī pūrī duniyā kī adālat kartā hai.

⁸vah hameshā apne ahd kā ḵẖayāl rakhtā hai, us kalām kā jo us ne hazār pushtoṅ ke liye farmāyā thā.

⁹yah vah ahd hai jo us ne ibrāhīm se bāṅdhā, vah vādā jo us ne qasam khā kar ishāq se kiyā thā.

¹⁰us ne use yāqūb ke liye qāim kiyā tāki vah us ke mutābiq zindagī guzāre, us ne tasdīq kī ki yah merā isrāīl se abdī ahd hai.

¹¹sāth sāth us ne farmāyā, “maiṅ tujhe mulk-e-kan’ān dūṅgā. yah terī mīrās kā hissā hogā.”

¹²us vaqt vah tādād meṅ kam aur thoṛe hī the balki mulk meṅ ajnabī hī the.

¹³ab tak vah muḵẖtalif qaumoṅ aur saltanatoṅ meṅ ghūmte phirte the.

¹⁴lekin allāh ne un par kisī ko zulm karne na diyā, aur un kī ḵẖātir us ne bādshāhoṅ ko ḍāṅṭā,

¹⁵“mere masah kie hue ḵẖādimoṅ ko mat chheṛnā, mere nabiyoṅ ko nuqsān mat pahuṅchānā.”

¹⁶phir allāh ne mulk-e-kan’ān meṅ kāl paṛne diyā aur ḵẖurāk kā har zaḵẖīrā ḵẖatm kiyā.

¹⁷lekin us ne un ke āge āge ek ādmī ko misr bhejā yānī yūsuf ko jo ġulām ban kar faroḵẖt huā.

¹⁸us ke pāoṅ aur gardan zanjīroṅ meṅ jakṛe rahe

¹⁹jab tak vah kuchh pūrā na huā jis kī peshgoī yūsuf ne kī thī, jab tak rabb ke farmān ne us kī tasdīq na kī.

²⁰tab misrī bādshāh ne apne bandoṅ ko bhej kar use rihāī dī, qaumoṅ ke hukmarān ne use āzād kiyā.

²¹us ne use apne gharāne par nigrān aur apnī tamām milkiyat par hukmarān muqarrar kiyā.

²²yūsuf ko firaaun ke raīsoṅ ko apnī marzī ke mutābiq chalāne aur misrī buzurgoṅ ko hikmat kī tālīm dene kī zimmādārī bhī dī gaī.

²³phir yāqūb kā ḵẖāndān misr āyā, aur isrāīl hām ke mulk meṅ ajnabī kī haisiyat se basne lagā.

²⁴vahāṅ allāh ne apnī qaum ko bahut phalne phūlne diyā, us ne use us ke dushmanoṅ se ziyādā tāqatvar banā diyā.

²⁵sāth sāth us ne misriyoṅ kā ravayyā badal diyā, to vah us kī qaum isrāīl se nafrat karke rabb ke ḵẖādimoṅ se chālākiyāṅ karne lage.

²⁶tab allāh ne apne ḵẖādim mūsā aur apne chune hue bande hārūn ko misr meṅ bhejā.

²⁷mulk-e-hām meṅ ā kar unhoṅ ne un ke darmiyān allāh ke ilāhī nishān aur mojize dikhāe.

²⁸allāh ke hukm par misr par tārīkī chhā gaī, mulk meṅ aṅdherā ho gayā. lekin unhoṅ ne us ke farmān na māne.

²⁹us ne un kā pānī ḵẖūn meṅ badal kar un kī machhliyoṅ ko marvā diyā.

³⁰misr ke mulk par meṅṛhkoṅ ke ġol chhā gae jo un ke hukmarānoṅ ke andrūnī kamroṅ tak pahuṅch gae.

³¹allāh ke hukm par misr ke pūre ilāqe meṅ makkhiyoṅ aur jūoṅ ke ġol phail gae.

³²bārish kī bajāy us ne un ke mulk par ole aur dahakte shole barsāe.

³³us ne un kī aṅgūr kī beleṅ aur anjīr ke daraḵẖt tabāh kar die, un ke ilāqe ke daraḵẖt toṛ ḍāle.

³⁴us ke hukm par anaginat ṭiḍḍiyāṅ apne bacchoṅ samet mulk par hamlāāvar huīṅ.

³⁵vah un ke mulk kī tamām hariyālī aur un ke khetoṅ kī tamām paidāvār chaṭ kar gaīṅ.

³⁶phir allāh ne misr meṅ tamām pahalauṭhoṅ ko mār ḍālā, un kī mardāngī kā pahalā phal tamām huā.

³⁷is ke bād vah isrāīl ko chāṅdī aur sone se navāz kar misr se nikāl lāyā. us vaqt us ke qabīloṅ meṅ ṭhokar khāne vālā ek bhī nahīṅ thā.

³⁸misr ḵẖush thā jab vah ravānā hue, kyūṅki un par isrāīl kī dahshat chhā gaī thī.

³⁹din ko allāh ne un ke ūpar bādal kambal kī tarah bichhā diyā, rāt ko āg muhayyā kī tāki raushnī ho.

⁴⁰jab unhoṅ ne ḵẖurāk māṅgī to us ne unheṅ baṭer pahuṅchā kar āsmānī roṭī se ser kiyā.

⁴¹us ne chaṭān ko chāk kiyā to pānī phūṭ niklā, aur registān meṅ pānī kī nadiyāṅ bahane lagīṅ.

⁴²kyūṅki us ne us muqaddas vāde kā ḵẖayāl rakhā jo us ne apne ḵẖādim ibrāhīm se kiyā thā.

⁴³chunāṅche vah apnī chunī huī qaum ko misr se nikāl lāyā, aur vah ḵẖushī aur shādmānī ke nāre lagā kar nikal āe.

⁴⁴us ne unheṅ dīgar aqvām ke mamālik die, aur unhoṅ ne dīgar ummatoṅ kī mehanat ke phal par qabzā kiyā.

⁴⁵kyūṅki vah chāhatā thā ki vah us ke ahkām aur hidāyāt ke mutābiq zindagī guzāreṅ. rabb kī hamd ho.