Zabūr 107

¹rabb kā shukr karo, kyūṅki vah bhalā hai, aur us kī shafqat abdī hai.

²rabb ke najātayāftā jin ko us ne ivzānā de kar dushman ke qabze se chhuṛāyā hai sab yah kaheṅ.

³us ne unheṅ mashriq se maġrib tak aur shimāl se junūb tak dīgar mamālik se ikaṭṭhā kiyā hai.

⁴bāz registān meṅ sahīh rāstā bhūl kar vīrān rāste par māre māre phire, aur kahīṅ bhī ābādī na milī.

⁵bhūk aur piyās ke māre un kī jān niḍhāl ho gaī.

⁶tab unhoṅ ne apnī musībat meṅ rabb ko pukārā, aur us ne unheṅ un kī tamām pareshāniyoṅ se chhuṭkārā diyā.

⁷us ne unheṅ sahīh rāh par lā kar aisī ābādī tak pahuṅchāyā jahāṅ rah sakte the.

⁸vah rabb kā shukr kareṅ ki us ne apnī shafqat aur apne mojize insān par zāhir kie haiṅ.

⁹kyūṅki vah piyāsī jān ko āsūdā kartā aur bhūkī jān ko kasrat kī acchhī chīzoṅ se ser kartā hai.

¹⁰dūsre zanjīroṅ aur musībat meṅ jakṛe hue aṅdhere aur gaharī tārīkī meṅ baste the,

¹¹kyūṅki vah allāh ke farmānoṅ se sarkash hue the, unhoṅ ne allāh t’ālā kā faislā haqīr jānā thā.

¹²is liye allāh ne un ke dil ko taklīf meṅ mubtalā karke past kar diyā. jab vah ṭhokar khā kar gir gae aur madad karne vālā koī na rahā thā

¹³to unhoṅ ne apnī musībat meṅ rabb ko pukārā, aur us ne unheṅ un kī tamām pareshāniyoṅ se chhuṭkārā diyā.

¹⁴vah unheṅ aṅdhere aur gaharī tārīkī se nikāl lāyā aur un kī zanjīreṅ toṛ ḍālīṅ.

¹⁵vah rabb kā shukr kareṅ ki us ne apnī shafqat aur apne mojize insān par zāhir kie haiṅ.

¹⁶kyūṅki us ne pītal ke darvāze toṛ ḍāle, lohe ke kuṅḍe ṭukṛe ṭukṛe kar die haiṅ.

¹⁷kuchh log ahamaq the, vah apne sarkash chāl-chalan aur gunāhoṅ ke bāis pareshāniyoṅ meṅ mubtalā hue.

¹⁸unheṅ har ḵẖurāk se ghin āne lagī, aur vah maut ke darvāzoṅ ke qarīb pahuṅche.

¹⁹tab unhoṅ ne apnī musībat meṅ rabb ko pukārā, aur us ne unheṅ un kī tamām pareshāniyoṅ se chhuṭkārā diyā.

²⁰us ne apnā kalām bhej kar unheṅ shifā dī aur unheṅ maut ke gaṛhe se bachāyā.

²¹vah rabb kā shukr kareṅ ki us ne apnī shafqat aur mojize insān par zāhir kie haiṅ.

²²vah shukrguzārī kī qurbāniyāṅ pesh kareṅ aur ḵẖushī ke nāre lagā kar us ke kāmoṅ kā charchā kareṅ.

²³bāz baharī jahāz meṅ baiṭh gae aur tijārat ke silsile meṅ samundar par safar karte karte dūrdarāz ilāqoṅ tak pahuṅche.

²⁴unhoṅ ne rabb ke azīm kām aur samundar kī gaharāiyoṅ meṅ us ke mojize dekhe haiṅ.

²⁵kyūṅki rabb ne hukm diyā to āṅdhī chalī jo samundar kī maujeṅ bulandiyoṅ par lāī.

²⁶vah āsmān tak chaṛhīṅ aur gaharāiyoṅ tak utrīṅ. pareshānī ke bāis mallāhoṅ kī himmat javāb de gaī.

²⁷vah sharāb meṅ dhut ādmī kī tarah laṛkhaṛāte aur ḍagmagāte rahe. un kī tamām hikmat nākām sābit huī.

²⁸tab unhoṅ ne apnī musībat meṅ rabb ko pukārā, aur us ne unheṅ tamām pareshāniyoṅ se chhuṭkārā diyā.

²⁹us ne samundar ko thamā diyā aur ḵẖāmoshī phail gaī, lahareṅ sākit ho gaīṅ.

³⁰musāfir pursukūn hālāt dekh kar ḵẖush hue, aur allāh ne unheṅ manzil-e-maqsūd tak pahuṅchāyā.

³¹vah rabb kā shukr kareṅ ki us ne apnī shafqat aur apne mojize insān par zāhir kie haiṅ.

³²vah qaum kī jamāat meṅ us kī tāzīm kareṅ, buzurgoṅ kī majlis meṅ us kī hamd kareṅ.

³³kaī jagahoṅ par vah daryāoṅ ko registān meṅ aur chashmoṅ ko piyāsī zamīn meṅ badal detā hai.

³⁴bāshindoṅ kī burāī dekh kar vah zarḵẖez zamīn ko kallar ke biyābān meṅ badal detā hai.

³⁵dūsrī jagahoṅ par vah registān ko jhīl meṅ aur piyāsī zamīn ko chashmoṅ meṅ badal detā hai.

³⁶vahāṅ vah bhūkoṅ ko basā detā hai tāki ābādiyāṅ qāim kareṅ.

³⁷tab vah khet aur aṅgūr ke bāġ lagāte haiṅ jo ḵẖūb phal lāte haiṅ.

³⁸allāh unheṅ barkat detā hai to un kī tādād bahut baṛh jātī hai. vah un ke revṛoṅ ko bhī kam hone nahīṅ detā.

³⁹jab kabhī un kī tādād kam ho jātī aur vah musībat aur dukh ke bojh tale ḵẖāk meṅ dab jāte haiṅ

⁴⁰to vah shurfā par apnī hiqārat uṅḍel detā aur unheṅ registān meṅ bhagā kar sahīh rāste se dūr phirne detā hai.

⁴¹lekin muhtāj ko vah musībat kī daldal se nikāl kar sarfarāz kartā aur us ke ḵẖāndānoṅ ko bheṛ-bakriyoṅ kī tarah baṛhā detā hai.

⁴²sīdhī rāh par chalne vāle yah dekh kar ḵẖush hoṅge, lekin beinsāf kā muṅh band kiyā jāegā.

⁴³kaun dānishmand hai? vah is par dhyān de, vah rabb kī meharbāniyoṅ par ġaur kare.