Zabūr 110

abdī bādshāh aur imām

¹dāūd kā zabūr.

rabb ne mere rabb se kahā, “mere dahane hāth baiṭh, jab tak maiṅ tere dushmanoṅ ko tere pāoṅ kī chaukī na banā dūṅ.”

²rabb siyyūn se terī saltanat kī sarhaddeṅ baṛhā kar kahegā, “ās-pās ke dushmanoṅ par hukūmat kar!”

³jis din tū apnī fauj ko khaṛā karegā terī qaum ḵẖushī se tere pīchhe ho legī. tū muqaddas shān-o-shaukat se ārāstā ho kar tulū-e-subah ke bātin se apnī javānī kī os pāegā.

⁴rabb ne qasam khāī hai aur is se pachhatāegā nahīṅ, “tū abad tak imām hai, aisā imām jaisā malik-e-sidq thā.”

⁵rabb tere dahane hāth par rahegā aur apne ġazab ke din dīgar bādshāhoṅ ko chūr chūr karegā.

⁶vah qaumoṅ meṅ adālat karke maidān ko lāshoṅ se bhar degā aur dūr tak saroṅ ko pāsh pāsh karegā.

⁷rāste meṅ vah nadī se pānī pī legā, is liye apnā sar uṭhāe phiregā.