Zabūr 111

allāh ke fazl kī tamjīd

¹rabb kī hamd ho! maiṅ pūre dil se diyānatdāroṅ kī majlis aur jamāat meṅ rabb kā shukr karūṅgā.

²rabb ke kām azīm haiṅ. jo un se lutf’andoz hote haiṅ vah un kā ḵẖūb mutāl’ā karte haiṅ.

³us kā kām shāndār aur jalālī hai, us kī rāstī abad tak qāim rahatī hai.

⁴vah apne mojize yād karātā hai. rabb meharbān aur rahīm hai.

⁵jo us kā ḵẖauf mānte haiṅ unheṅ us ne ḵẖurāk muhayyā kī hai. vah hameshā tak apne ahd kā ḵẖayāl rakhegā.

⁶us ne apnī qaum ko apne zabardast kāmoṅ kā elān karke kahā, “maiṅ tumheṅ ġairqaumoṅ kī mīrās atā karūṅgā.”

⁷jo bhī kām us ke hāth kareṅ vah sacche aur rāst haiṅ. us ke tamām ahkām qābil-e-etimād haiṅ.

⁸vah azal se abad tak qāim haiṅ, aur un par sacchāī aur diyānatdārī se amal karnā hai.

⁹us ne apnī qaum kā fidyā bhej kar use chhuṛāyā hai. us ne farmāyā, “merā qaum ke sāth ahd abad tak qāim rahe.” us kā nām quddūs aur purjalāl hai.

¹⁰hikmat is se shurū hotī hai ki ham rabb kā ḵẖauf māneṅ. jo bhī us ke ahkām par amal kare use acchhī samajh hāsil hogī. us kī hamd hameshā tak qāim rahegī.