Zabūr 118
allāh kī madad par shukrguzārī
1rabb kā shukr karo, kyūṅki vah bhalā hai, aur us kī shafqat abdī hai.
2isrāīl kahe, “us kī shafqat abdī hai.”
3hārūn kā gharānā kahe, “us kī shafqat abdī hai.”
4rabb kā ḵẖauf mānne vāle kaheṅ, “us kī shafqat abdī hai.”
5musībat meṅ maiṅ ne rabb ko pukārā to rabb ne merī sun kar mere pāoṅ ko khule maidān meṅ qāim kar diyā hai.
6rabb mere haq meṅ hai, is liye maiṅ nahīṅ ḍarūṅgā. insān merā kyā bigāṛ saktā hai?
7rabb mere haq meṅ hai aur merā sahārā hai, is liye maiṅ un kī shikast dekh kar ḵẖush hūṅgā jo mujh se nafrat karte haiṅ.
8rabb meṅ panāh lenā insān par etimād karne se kahīṅ behatar hai.
9rabb meṅ panāh lenā shurfā par etimād karne se kahīṅ behatar hai.
10tamām aqvām ne mujhe gher liyā, lekin maiṅ ne allāh kā nām le kar unheṅ bhagā diyā.
11unhoṅ ne mujhe gher liyā, hāṅ chāroṅ taraf se gher liyā, lekin maiṅ ne allāh kā nām le kar unheṅ bhagā diyā.
12vah shahad kī makkhiyoṅ kī tarah chāroṅ taraf se mujh par hamlāāvar hue, lekin kāṅṭedār jhāṛiyoṅ kī āg kī tarah jald hī bujh gae. maiṅ ne rabb kā nām le kar unheṅ bhagā diyā.
13dushman ne mujhe dhakkā de kar girāne kī koshish kī, lekin rabb ne merī madad kī.
14rabb merī quvvat aur merā gīt hai, vah merī najāt ban gayā hai.
15ḵẖushī aur fatah ke nāre rāstbāzoṅ ke ḵẖaimoṅ meṅ gūṅjte haiṅ, “rabb kā dahanā hāth zabardast kām kartā hai!
16rabb kā dahanā hāth sarfarāz kartā hai, rabb kā dahanā hāth zabardast kām kartā hai!”
17maiṅ nahīṅ marūṅgā balki zindā rah kar rabb ke kām bayān karūṅgā.
18go rabb ne merī saḵẖt tādīb kī hai, us ne mujhe maut ke havāle nahīṅ kiyā.
19rāstī ke darvāze mere liye khol do tāki maiṅ un meṅ dāḵẖil ho kar rabb kā shukr karūṅ.
20yah rabb kā darvāzā hai, isī meṅ rāstbāz dāḵẖil hote haiṅ.
21maiṅ terā shukr kartā hūṅ, kyūṅki tū ne merī sun kar mujhe bachāyā hai.
22jis patthar ko makān banāne vāloṅ ne radd kiyā vah kone kā bunyādī patthar ban gayā.
23yah rabb ne kiyā aur dekhne meṅ kitnā hairat’aṅgez hai.
24isī din rabb ne apnī qudrat dikhāī hai. āo, ham shādiyānā bajā kar us kī ḵẖushī manāeṅ.
25ai rabb, meharbānī karke hameṅ bachā! ai rabb, meharbānī karke kāmyābī atā farmā!
26mubārak hai vah jo rabb ke nām se ātā hai. rabb kī sukūnatgāh se ham tumheṅ barkat dete haiṅ.
27rabb hī ḵẖudā hai, aur us ne hameṅ raushnī baḵẖshī hai. āo, īd kī qurbānī rassiyoṅ se qurbāngāh ke sīṅgoṅ ke sāth bāndho.
28tū merā ḵẖudā hai, aur maiṅ terā shukr kartā hūṅ. ai mere ḵẖudā, maiṅ terī tāzīm kartā hūṅ.
29rabb kī sitāish karo, kyūṅki vah bhalā hai aur us kī shafqat abdī hai.