Zabūr 123

allāh ham par meharbānī kare

¹ziyārat kā gīt.

maiṅ apnī āṅkhoṅ ko terī taraf uṭhātā hūṅ, terī taraf jo āsmān par taḵẖtnashīn hai.

²jis tarah ġulām kī āṅkheṅ apne mālik ke hāth kī taraf aur lauṅḍī kī āṅkheṅ apnī mālikan ke hāth kī taraf lagī rahatī haiṅ usī tarah hamārī āṅkheṅ rabb apne ḵẖudā par lagī rahatī haiṅ, jab tak vah ham par meharbānī na kare.

³ai rabb, ham par meharbānī kar, ham par meharbānī kar! kyūṅki ham hadd se ziyādā hiqārat kā nishānā ban gae haiṅ.

⁴sukūn se zindagī guzārne vāloṅ kī lān-tān aur maġrūroṅ kī tahqīr se hamārī jān dūbhar ho gaī hai.