Zabūr 126

rabb apne qaidiyoṅ ko rihāī detā hai

¹ziyārat kā gīt.

jab rabb ne siyyūn ko bahāl kiyā to aisā lag rahā thā ki ham ḵẖavāb dekh rahe haiṅ.

²tab hamārā muṅh haṅsī-ḵẖushī se bhar gayā, aur hamārī zabān shādmānī ke nāre lagāne se ruk na sakī. tab dīgar qaumoṅ meṅ kahā gayā, “rabb ne un ke liye zabardast kām kiyā hai.”

³rabb ne vāqaī hamāre liye zabardast kām kiyā hai. ham kitne ḵẖush the, kitne ḵẖush!

⁴ai rabb, hameṅ bahāl kar. jis tarah mausam-e-barsāt meṅ dasht-e-najab ke ḵẖushk nāle pānī se bhar jāte haiṅ usī tarah hameṅ bahāl kar.

⁵jo āṅsū bahā bahā kar bīj boeṅ vah ḵẖushī ke nāre lagā kar fasal kāṭeṅge.

⁶vah rote hue bīj bone ke liye nikaleṅge, lekin jab fasal pak jāe to ḵẖushī ke nāre lagā kar pūle uṭhāe apne ghar lauṭeṅge.