Zabūr 13

¹dāūd kā zabūr. mūsīqī ke rāhanumā ke liye.

ai rabb, kab tak? kyā tū mujhe abad tak bhūlā rahegā? tū kab tak apnā chiharā mujh se chhupāe rakhegā?

²merī jān kab tak pareshāniyoṅ meṅ mubtalā rahe, merā dil kab tak roz-ba-roz dukh uṭhātā rahe? merā dushman kab tak mujh par ġālib rahegā?

³ai rabb mere ḵẖudā, mujh par nazar ḍāl kar merī sun! merī āṅkhoṅ ko raushan kar, varnā maiṅ maut kī nīṅd so jāūṅgā.

⁴tab merā dushman kahegā, “maiṅ us par ġālib ā gayā hūṅ!” aur mere muḵẖālif shādiyānā bajāeṅge ki maiṅ hil gayā hūṅ.

⁵lekin maiṅ terī shafqat par bharosā rakhtā hūṅ, merā dil terī najāt dekh kar ḵẖushī manāegā.

⁶maiṅ rabb kī tamjīd meṅ gīt gāūṅgā, kyūṅki us ne mujh par ehsān kiyā hai.