Zabūr 130

baṛī musībat se rihāī kī duā (taubā kā chhaṭā zabūr)

¹ziyārat kā gīt.

ai rabb, maiṅ tujhe gaharāiyoṅ se pukārtā hūṅ.

²ai rabb, merī āvāz sun! kān lagā kar merī iltijāoṅ par dhyān de!

³ai rabb, agar tū hamāre gunāhoṅ kā hisāb kare to kaun qāim rahegā? koī bhī nahīṅ!

⁴lekin tujh se muāfī hāsil hotī hai tāki terā ḵẖauf mānā jāe.

⁵maiṅ rabb ke intizār meṅ hūṅ, merī jān shiddat se intizār kartī hai. maiṅ us ke kalām se ummīd rakhtā hūṅ.

⁶paharedār jis shiddat se pau phaṭne ke intizār meṅ rahate haiṅ, merī jān us se bhī ziyādā shiddat ke sāth, hāṅ ziyādā shiddat ke sāth rabb kī muntazir rahatī hai.

⁷ai isrāīl, rabb kī rāh dekhtā rah! kyūṅki rabb ke pās shafqat aur fidyā kā ṭhos band-o-bast hai.

⁸vah isrāīl ke tamām gunāhoṅ kā fidyā de kar use najāt degā.