Zabūr 135
allāh kī parastish
1rabb kī hamd ho! rabb ke nām kī sitāish karo! us kī tamjīd karo, ai rabb ke tamām ḵẖādimo,
2jo rabb ke ghar meṅ, hamāre ḵẖudā kī bārgāhoṅ meṅ khaṛe ho.
3rabb kī hamd karo, kyūṅki rabb bhalā hai. us ke nām kī madahsarāī karo, kyūṅki vah piyārā hai.
4kyūṅki rabb ne yāqūb ko apne liye chun liyā, isrāīl ko apnī milkiyat banā liyā hai.
5hāṅ, maiṅ ne jān liyā hai ki rabb azīm hai, ki hamārā rabb dīgar tamām mābūdoṅ se ziyādā azīm hai.
6rabb jo jī chāhe kartā hai, ḵẖwāh āsmān par ho yā zamīn par, ḵẖwāh samundaroṅ meṅ ho yā gaharāiyoṅ meṅ kahīṅ bhī ho.
7vah zamīn kī intihā se bādal chaṛhne detā aur bijlī bārish ke liye paidā kartā hai, vah havā apne godāmoṅ se nikāl lātā hai.
8misr meṅ us ne insān-o-haivān ke tamām pahalauṭhoṅ ko mār ḍālā.
9ai misr, us ne apne ilāhī nishān aur mojizāt tere darmiyān hī kie. tab firaaun aur us ke tamām mulāzim un kā nishānā ban gae.
10us ne mut’addid qaumoṅ ko shikast de kar tāqatvar bādshāhoṅ ko maut ke ghāṭ utār diyā.
11amoriyoṅ kā bādshāh sīhon, basan kā bādshāh oj aur mulk-e-kan’ān kī tamām saltanateṅ na rahīṅ.
12us ne un kā mulk isrāīl ko de kar farmāyā ki āindā yah merī qaum kī maurūsī milkiyat hogā.
13ai rabb, terā nām abdī hai. ai rabb, tujhe pusht-dar-pusht yād kiyā jāegā.
14kyūṅki rabb apnī qaum kā insāf karke apne ḵẖādimoṅ par taras khāegā.
15dīgar qaumoṅ ke but sone-chāṅdī ke haiṅ, insān ke hāth ne unheṅ banāyā.
16un ke muṅh haiṅ lekin vah bol nahīṅ sakte, un kī āṅkheṅ haiṅ lekin vah dekh nahīṅ sakte.
17un ke kān haiṅ lekin vah sun nahīṅ sakte, un ke muṅh meṅ sāṅs hī nahīṅ hotī.
18jo but banāte haiṅ vah un kī mānind ho jāeṅ, jo un par bharosā rakhte haiṅ vah un jaise behiss-o-harkat ho jāeṅ.
19ai isrāīl ke gharāne, rabb kī sitāish kar. ai hārūn ke gharāne, rabb kī tamjīd kar.
20ai lāvī ke gharāne, rabb kī hamd-o-sanā kar. ai rabb kā ḵẖauf mānne vālo, rabb kī sitāish karo.
21siyyūn se rabb kī hamd ho. us kī hamd ho jo yarūshalam meṅ sukūnat kartā hai. rabb kī hamd ho