Zabūr 137
bābal meṅ jilāvatanoṅ kī āh-o-zārī
1jab siyyūn kī yād āī to ham bābal kī naharoṅ ke kināre hī baiṭh kar ro paṛe.
2ham ne vahāṅ ke safedā ke daraḵẖtoṅ se apne sarod laṭkā die,
3kyūṅki jinhoṅ ne hameṅ giriftār kiyā thā unhoṅ ne hameṅ vahāṅ gīt gāne ko kahā, aur jo hamārā mazāq uṛāte haiṅ unhoṅ ne ḵẖushī kā mutālbā kiyā, “hameṅ siyyūn kā koī gīt sunāo!”
4lekin ham ajnabī mulk meṅ kis tarah rabb kā gīt gāeṅ?
5ai yarūshalam, agar maiṅ tujhe bhūl jāūṅ to merā dahanā hāth sūkh jāe.
6agar maiṅ tujhe yād na karūṅ aur yarūshalam ko apnī azīmtarīn ḵẖushī se ziyādā qīmtī na samjhūṅ to merī zabān tālū se chipak jāe.
7ai rabb, vah kuchh yād kar jo adomiyoṅ ne us din kiyā jab yarūshalam dushman ke qabze meṅ āyā. us vaqt vah bole, “use ḍhā do! bunyādoṅ tak use girā do!”
8ai bābal beṭī jo tabāh karne par tulī huī hai, mubārak hai vah jo tujhe us kā badlā de jo tū ne hamāre sāth kiyā hai.
9mubārak hai vah jo tere bacchoṅ ko pakaṛ kar patthar par paṭaḵẖ de.