Zabūr 138

allāh kī madad ke liye shukrguzārī

¹dāūd kā zabūr.

ai rabb, maiṅ pūre dil se terī sitāish karūṅgā, mābūdoṅ ke sāmne hī terī tamjīd karūṅgā.

²maiṅ terī muqaddas sukūnatgāh kī taraf ruḵẖ karke sijdā karūṅgā, terī meharbānī aur vafādārī ke bāis terā shukr karūṅgā. kyūṅki tū ne apne nām aur kalām ko tamām chīzoṅ par sarfarāz kiyā hai.

³jis din maiṅ ne tujhe pukārā tū ne merī sun kar merī jān ko baṛī taqviyat dī.

⁴ai rabb, duniyā ke tamām hukmarān tere muṅh ke farmān sun kar terā shukr kareṅ.

⁵vah rabb kī rāhoṅ kī madahsarāī kareṅ, kyūṅki rabb kā jalāl azīm hai.

⁶kyūṅki go rabb bulandiyoṅ par hai vah pastahāl kā ḵẖayāl kartā aur maġrūroṅ ko dūr se hī pahachān letā hai.

⁷jab kabhī musībat merā dāman nahīṅ chhoṛtī to tū merī jān ko tāzādam kartā hai, tū apnā dahanā hāth baṛhā kar mujhe mere dushmanoṅ ke taish se bachātā hai.

⁸rabb merī ḵẖātir badlā legā. ai rabb, terī shafqat abdī hai. unheṅ na chhoṛ jin ko tere hāthoṅ ne banāyā hai