Zabūr 14

¹dāūd kā zabūr. mūsīqī ke rāhanumā ke liye.

ahamaq dil meṅ kahatā hai, “allāh hai hī nahīṅ!” aise log badachalan haiṅ, un kī harkateṅ qābil-e-ghin haiṅ. ek bhī nahīṅ hai jo acchhā kām kare.

²rabb ne āsmān se insān par nazar ḍālī tāki dekhe ki kyā koī samajhdār hai? kyā koī allāh kā tālib hai?

³afsos, sab sahīh rāh se bhaṭak gae, sab ke sab bigaṛ gae haiṅ. koī nahīṅ jo bhalāī kartā ho, ek bhī nahīṅ.

⁴kyā jo badī karke merī qaum ko roṭī kī tarah khā lete haiṅ un meṅ se ek ko bhī samajh nahīṅ ātī? vah to rabb ko pukārte hī nahīṅ.

⁵tab un par saḵẖt dahshat chhā gaī, kyūṅki allāh rāstbāz kī nasal ke sāth hai.

⁶tum nāchār ke mansūboṅ ko ḵẖāk meṅ milānā chāhate ho, lekin rabb ḵẖud us kī panāhgāh hai.

⁷kāsh koh-e-siyyūn se isrāīl kī najāt nikle! jab rabb apnī qaum ko bahāl karegā to yāqūb ḵẖushī ke nāre lagāegā, isrāīl bāġ bāġ hogā.