Zabūr 145

¹dāūd kā zabūr. hamd-o-sanā kā gīt.

ai mere ḵẖudā, maiṅ terī tāzīm karūṅgā. ai bādshāh, maiṅ hameshā tak tere nām kī sitāish karūṅgā.

²rozānā maiṅ terī tamjīd karūṅgā, hameshā tak tere nām kī hamd karūṅgā.

³rabb azīm aur baṛī tārīf ke lāiq hai. us kī azmat insān kī samajh se bāhar hai.

⁴ek pusht aglī pusht ke sāmne vah kuchh sarāhe jo tū ne kiyā hai, vah dūsroṅ ko tere zabardast kām sunāeṅ.

⁵maiṅ tere shāndār jalāl kī azmat aur tere mojizoṅ meṅ mahav-e-ḵẖayāl rahūṅgā.

⁶log tere haibtanāk kāmoṅ kī qudrat pesh kareṅ, aur maiṅ bhī terī azmat bayān karūṅgā.

⁷vah josh se terī baṛī bhalāī ko sarāheṅ aur ḵẖushī se terī rāstī kī madahsarāī kareṅ.

⁸rabb meharbān aur rahīm hai. vah tahammul aur shafqat se bharpūr hai.

⁹rabb sab ke sāth bhalāī kartā hai, vah apnī tamām maḵẖlūqāt par raham kartā hai.

¹⁰ai rabb, terī tamām maḵẖlūqāt terā shukr kareṅ. tere īmāndār terī tamjīd kareṅ.

¹¹vah terī bādshāhī ke jalāl par faḵẖar kareṅ aur terī qudrat bayān kareṅ

¹²tāki ādamzād tere qavī kāmoṅ aur terī bādshāhī kī jalālī shān-o-shaukat se āgāh ho jāeṅ.

¹³terī bādshāhī kī koī intihā nahīṅ, aur terī saltanat pusht-dar-pusht hameshā tak qāim rahegī.

¹⁴rabb tamām girne vāloṅ kā sahārā hai. jo bhī dab jāe use vah uṭhā khaṛā kartā hai.

¹⁵sab kī āṅkheṅ tere intizār meṅ rahatī haiṅ, aur tū har ek ko vaqt par us kā khānā muhayyā kartā hai.

¹⁶tū apnī muṭṭhī khol kar har jāndār kī ḵẖwāhish pūrī kartā hai.

¹⁷rabb apnī tamām rāhoṅ meṅ rāst aur apne tamām kāmoṅ meṅ vafādār hai.

¹⁸rabb un sab ke qarīb hai jo use pukārte haiṅ, jo diyānatdārī se use pukārte haiṅ.

¹⁹jo us kā ḵẖauf māneṅ un kī ārzū vah pūrī kartā hai. vah un kī faryādeṅ sun kar un kī madad kartā hai.

²⁰rabb un sab ko mahfūz rakhtā hai jo use piyār karte haiṅ, lekin bedīnoṅ ko vah halāk kartā hai.

²¹merā muṅh rabb kī tārīf bayān kare, tamām maḵẖlūqāt hameshā tak us ke muqaddas nām kī sitāish kareṅ.