Zabūr 148
āsmān-o-zamīn par allāh kī tamjīd
1rabb kī hamd ho! āsmān se rabb kī sitāish karo, bulandiyoṅ par us kī tamjīd karo!
2ai us ke tamām farishto, us kī hamd karo! ai us ke tamām lashkro, us kī tārīf karo!
3ai sūraj aur chāṅd, us kī hamd karo! ai tamām chamakdār sitāro, us kī sitāish karo!
4ai bulandtarīn āsmāno aur āsmān ke ūpar ke pānī, us kī hamd karo!
5vah rabb ke nām kī sitāish kareṅ, kyūṅki us ne farmāyā to vah vujūd meṅ āe.
6us ne nāqābil-e-mansūḵẖ farmān jārī karke unheṅ hameshā ke liye qāim kiyā hai.
7ai samundar ke ajhdahāo aur tamām gaharāiyo, zamīn se rabb kī tamjīd karo!
8ai āg, olo, barf, dhund aur us ke hukm par chalne vālī āṅdhiyo, us kī hamd karo!
9ai pahāṛo aur pahāṛiyo, phaldār daraḵẖto aur tamām deodāro, us kī tārīf karo!
10ai jaṅglī jānavro, mavīshiyo, reṅgne vālī maḵẖlūqāt aur parando, us kī hamd karo!
11ai zamīn ke bādshāho aur tamām qaumo, sardāro aur zamīn ke tamām hukmrāno, us kī tamjīd karo!
12ai naujvāno aur kuṅvāriyo, buzurgo aur baccho, us kī hamd karo!
13sab rabb ke nām kī sitāish kareṅ, kyūṅki sirf usī kā nām azīm hai, us kī azmat āsmān-o-zamīn se ālā hai.
14us ne apnī qaum ko sarfarāz karke [a] lafzī tarjumā : apnī qaum kā sīṅg buland karke. apne tamām īmāndāroṅ kī shuharat baṛhāī hai, yānī isrāīliyoṅ kī shuharat, us qaum kī jo us ke qarīb rahatī hai. rabb kī hamd ho