Zabūr 149

¹rabb kī hamd ho! rabb kī tamjīd meṅ nayā gīt gāo, īmāndāroṅ kī jamāat meṅ us kī tārīf karo.

²isrāīl apne ḵẖāliq se ḵẖush ho, siyyūn ke farzand apne bādshāh kī ḵẖushī manāeṅ.

³vah nāch kar us ke nām kī sitāish kareṅ, daf aur sarod se us kī madahsarāī kareṅ.

⁴kyūṅki rabb apnī qaum se ḵẖush hai. vah musībatazadoṅ ko apnī najāt kī shān-o-shaukat se ārāstā kartā hai.

⁵īmāndār is shān-o-shaukat ke bāis ḵẖushī manāeṅ, vah apne bistaroṅ par shādmānī ke nāre lagāeṅ.

⁶un ke muṅh meṅ allāh kī hamd-o-sanā aur un ke hāthoṅ meṅ dodhārī talvār ho

⁷tāki dīgar aqvām se intiqām leṅ aur ummatoṅ ko sazā deṅ.

⁸vah un ke bādshāhoṅ ko zanjīroṅ meṅ aur un ke shurfā ko beṛiyoṅ meṅ jakaṛ leṅge

⁹tāki unheṅ vah sazā deṅ jis kā faislā qalamband ho chukā hai. yah izzat allāh ke tamām īmāndāroṅ ko hāsil hai. rabb kī hamd ho