Zabūr 19

maḵẖlūqāt meṅ allāh kā jalāl

¹dāūd kā zabūr. mūsīqī ke rāhanumā ke liye.

āsmān allāh ke jalāl kā elān karte haiṅ, āsmānī gumbad us ke hāthoṅ kā kām bayān kartā hai.

²ek din dūsre ko ittilā detā, ek rāt dūsrī ko ḵẖabar pahuṅchātī hai,

³lekin zabān se nahīṅ. go un kī āvāz sunāī nahīṅ detī,

⁴to bhī un kī āvāz nikal kar pūrī duniyā meṅ sunāī detī, un ke alfāz duniyā kī intihā tak pahuṅch jāte haiṅ. vahāṅ allāh ne āftāb ke liye ḵẖaimā lagāyā hai.

⁵jis tarah dūlhā apnī ḵẖwābgāh se nikaltā hai usī tarah sūraj nikal kar pahalavān kī tarah apnī dauṛ dauṛne par ḵẖushī manātā hai.

⁶āsmān ke ek sire se chaṛh kar us kā chakkar dūsre sire tak lagtā hai. us kī taptī garmī se koī bhī chīz poshīdā nahīṅ rahatī.

⁷rabb kī sharīat kāmil hai, us se jān meṅ jān ā jātī hai. rabb ke ahkām qābil-e-etimād haiṅ, un se sādālauh dānishmand ho jātā hai.

⁸rabb kī hidāyāt bā-insāf haiṅ, un se dil bāġ bāġ ho jātā hai. rabb ke ahkām pāk haiṅ, un se āṅkheṅ chamak uṭhtī haiṅ.

⁹rabb kā ḵẖauf pāk hai aur abad tak qāim rahegā. rabb ke farmān sacche aur sab ke sab rāst haiṅ.

¹⁰vah sone balki ḵẖālis sone ke ḍher se ziyādā marġūb haiṅ. vah shahad balki chhatte ke tāzā shahad se ziyādā mīṭhe haiṅ.

¹¹un se tere ḵẖādim ko āgāh kiyā jātā hai, un par amal karne se baṛā ajr miltā hai.

¹²jo ḵẖatāeṅ beḵẖabrī meṅ sarzad huīṅ kaun unheṅ jāntā hai? mere poshīdā gunāhoṅ ko muāf kar!

¹³apne ḵẖādim ko gustākhoṅ se mahfūz rakh tāki vah mujh par hukūmat na kareṅ. tab maiṅ beilzām ho kar saṅgīn gunāh se pāk rahūṅgā.

¹⁴ai rabb, baḵẖsh de ki mere muṅh kī bāteṅ aur mere dil kī soch-bichār tujhe pasand āe. tū hī merī chaṭān aur merā chhuṛāne vālā hai.