Zabūr 2

allāh kā masīh

¹aqvām kyūṅ taish meṅ ā gaī haiṅ? ummateṅ kyūṅ bekār sāzisheṅ kar rahī haiṅ?

²duniyā ke bādshāh uṭh khaṛe hue, hukmarān rabb aur us ke masīh ke ḵẖilāf jamā ho gae haiṅ.

³vah kahate haiṅ, “āo, ham un kī zanjīroṅ ko toṛ kar āzād ho jāeṅ, un ke rassoṅ ko dūr tak phaiṅk deṅ.”

⁴lekin jo āsmān par taḵẖtnashīn hai vah haṅstā hai, rabb un kā mazāq uṛātā hai.

⁵phir vah ġusse se unheṅ ḍāṅṭtā, apnā shadīd ġazab un par nāzil karke unheṅ ḍarātā hai.

⁶vah farmātā hai, “maiṅ ne ḵẖud apne bādshāh ko apne muqaddas pahāṛ siyyūn par muqarrar kiyā hai!”

⁷āo, maiṅ rabb kā farmān sunāūṅ. us ne mujh se kahā, “tū merā beṭā hai, āj maiṅ terā bāp ban gayā hūṅ.

⁸mujh se māṅg to maiṅ tujhe mīrās meṅ tamām aqvām atā karūṅgā, duniyā kī intihā tak sab kuchh baḵẖsh dūṅgā.

⁹tū unheṅ lohe ke shāhī asā se pāsh pāsh karegā, unheṅ miṭṭī ke bartanoṅ kī tarah chiknā-chūr karegā.”

¹⁰chunāṅche ai bādshāho, samajh se kām lo! ai duniyā ke hukmrāno, tarbiyat qabūl karo!

¹¹ḵẖauf karte hue rabb kī ḵẖidmat karo, larazte hue ḵẖushī manāo.

¹²beṭe ko bosā do, aisā na ho ki vah ġusse ho jāe aur tum rāste meṅ hī halāk ho jāo. kyūṅki vah ek dam taish meṅ ā jātā hai. mubārak haiṅ vah sab jo us meṅ panāh lete haiṅ.