Zabūr 20

fatah ke liye duā

¹dāūd kā zabūr. mūsīqī ke rāhanumā ke liye.

musībat ke din rabb terī sune, yāqūb ke ḵẖudā kā nām tujhe mahfūz rakhe.

²vah maqdis se terī madad bheje, vah siyyūn se terā sahārā bane.

³vah terī ġallā kī nazreṅ yād kare, terī bhasm hone vālī qurbāniyāṅ qabūl farmāe. (silāh)

⁴vah tere dil kī ārzū pūrī kare, tere tamām mansūboṅ ko kāmyābī baḵẖshe.

⁵tab ham terī najāt kī ḵẖushī manāeṅge, ham apne ḵẖudā ke nām meṅ fatah kā jhaṅḍā gāṛeṅge. rabb terī tamām guzārisheṅ pūrī kare.

⁶ab maiṅ ne jān liyā hai ki rabb apne masah kie hue bādshāh kī madad kartā hai. vah apne muqaddas āsmān se us kī sun kar apne dahane hāth kī qudrat se use chhuṭkārā degā.

⁷bāz apne rathoṅ par, bāz apne ghoṛoṅ par faḵẖar karte haiṅ, lekin ham rabb apne ḵẖudā ke nām par faḵẖar kareṅge.

⁸hamāre dushman jhuk kar gir jāeṅge, lekin ham uṭh kar mazbūtī se khaṛe raheṅge.

⁹ai rabb, hamārī madad farmā! bādshāh hamārī sune jab ham madad ke liye pukāreṅ.