Zabūr 21

¹dāūd kā zabūr. mūsīqī ke rāhanumā ke liye.

ai rabb, bādshāh terī quvvat dekh kar shādmān hai, vah terī najāt kī kitnī baṛī ḵẖushī manātā hai.

²tū ne us kī dilī ḵẖwāhish pūrī kī aur inkār na kiyā jab us kī ārzū ne hoṅṭoṅ par alfāz kā rūp dhārā. (silāh)

³kyūṅki tū acchhī acchhī barkateṅ apne sāth le kar us se milne āyā, tū ne use ḵẖālis sone kā tāj pahanāyā.

⁴us ne tujh se zindagī pāne kī ārzū kī to tū ne use umr kī darāzī baḵẖshī, mazīd itne din ki un kī intihā nahīṅ.

⁵terī najāt se use baṛī izzat hāsil huī, tū ne use shān-o-shaukat se ārāstā kiyā.

⁶kyūṅki tū use abad tak barkat detā, use apne chihare ke huzūr lā kar nihāyat ḵẖush kar detā hai.

⁷kyūṅki bādshāh rabb par etimād kartā hai, allāh t’ālā kī shafqat use ḍagmagāne se bachāegī.

⁸tere dushman tere qabze meṅ ā jāeṅge, jo tujh se nafrat karte haiṅ unheṅ terā dahanā hāth pakaṛ legā.

⁹jab tū un par zāhir hogā to vah bhaṛaktī bhaṭṭī kī sī musībat meṅ phaṅs jāeṅge. rabb apne ġazab meṅ unheṅ haṛap kar legā, aur āg unheṅ khā jāegī.

¹⁰tū un kī aulād ko rū-e-zamīn par se miṭā ḍālegā, insānoṅ meṅ un kā nām-o-nishān tak nahīṅ rahegā.

¹¹go vah tere ḵẖilāf sāzisheṅ karte haiṅ to bhī un ke bure mansūbe nākām raheṅge.

¹²kyūṅki tū unheṅ bhagā kar un ke chiharoṅ ko apne tīroṅ kā nishānā banā degā.

¹³ai rabb, uṭh aur apnī qudrat kā izhār kar tāki ham terī qudrat kī tamjīd meṅ sāz bajā kar gīt gāeṅ.