Zabūr 25

¹dāūd kā zabūr.

ai rabb, maiṅ terā ārzūmand hūṅ.

²ai mere ḵẖudā, tujh par maiṅ bharosā rakhtā hūṅ. mujhe sharmindā na hone de ki mere dushman mujh par shādiyānā bajāeṅ.

³kyūṅki jo bhī tujh par ummīd rakhe vah sharmindā nahīṅ hogā jabki jo bilāvajah bevafā hote haiṅ vahī sharmindā ho jāeṅge.

⁴ai rabb, apnī rāheṅ mujhe dikhā, mujhe apne rāstoṅ kī tālīm de.

⁵apnī sacchāī ke mutābiq merī rāhanumāī kar, mujhe tālīm de. kyūṅki tū merī najāt kā ḵẖudā hai. din bhar maiṅ tere intizār meṅ rahatā hūṅ.

⁶ai rabb, apnā vah raham aur meharbānī yād kar jo tū qadīm zamāne se kartā āyā hai.

⁷ai rabb, merī javānī ke gunāhoṅ aur merī bevafā harkatoṅ ko yād na kar balki apnī bhalāī kī ḵẖātir aur apnī shafqat ke mutābiq merā ḵẖayāl rakh.

⁸rabb bhalā aur ādil hai, is liye vah gunāhgāroṅ ko sahīh rāh par chalne kī talqīn kartā hai.

⁹vah farotanoṅ kī insāf kī rāh par rāhanumāī kartā, halīmoṅ ko apnī rāh kī tālīm detā hai.

¹⁰jo rabb ke ahd aur ahkām ke mutābiq zindagī guzāreṅ unheṅ rabb meharbānī aur vafādārī kī rāhoṅ par le chaltā hai.

¹¹ai rabb, merā qusūr saṅgīn hai, lekin apne nām kī ḵẖātir use muāf kar.

¹²rabb kā ḵẖauf mānne vālā kahāṅ hai? rabb ḵẖud use us rāh kī tālīm degā jo use chunnā hai.

¹³tab vah ḵẖushhāl rahegā, aur us kī aulād mulk ko mīrās meṅ pāegī.

¹⁴jo rabb kā ḵẖauf māneṅ unheṅ vah apne hamrāz banā kar apne ahd kī tālīm detā hai.

¹⁵merī āṅkheṅ rabb ko taktī rahatī haiṅ, kyūṅki vahī mere pāoṅ ko jāl se nikāl letā hai.

¹⁶merī taraf māil ho jā, mujh par meharbānī kar! kyūṅki maiṅ tanhā aur musībatzadā hūṅ.

¹⁷mere dil kī pareshāniyāṅ dūr kar, mujhe merī takālīf se rihāī de.

¹⁸merī musībat aur taṅgī par nazar ḍāl kar merī ḵẖatāoṅ ko muāf kar.

¹⁹dekh, mere dushman kitne ziyādā haiṅ, vah kitnā zulm karke mujh se nafrat karte haiṅ.

²⁰merī jān ko mahfūz rakh, mujhe bachā! mujhe sharmindā na hone de, kyūṅki maiṅ tujh meṅ panāh letā hūṅ.

²¹begunāhī aur diyānatdārī merī paharādārī kareṅ, kyūṅki maiṅ tere intizār meṅ rahatā hūṅ.

²²ai allāh, fidyā de kar isrāīl ko us kī tamām takālīf se āzād kar