Zabūr 26

¹dāūd kā zabūr.

ai rabb, merā insāf kar, kyūṅki merā chāl-chalan bequsūr hai. maiṅ ne rabb par bharosā rakhā hai, aur maiṅ ḍāṅvāṅḍol nahīṅ ho jāūṅgā.

²ai rabb, mujhe jāṅch le, mujhe āzmā kar dil kī tah tak merā muāinā kar.

³kyūṅki terī shafqat merī āṅkhoṅ ke sāmne rahī hai, maiṅ terī sacchī rāh par chaltā rahā hūṅ.

⁴na maiṅ dhokebāzoṅ kī majlis meṅ baiṭhtā, na chālāk logoṅ se rifāqat rakhtā hūṅ.

⁵mujhe sharīroṅ ke ijatimāoṅ se nafrat hai, bedīnoṅ ke sāth maiṅ baiṭhtā bhī nahīṅ.

⁶ai rabb, maiṅ apne hāth dho kar apnī begunāhī kā izhār kartā hūṅ. maiṅ terī qurbāngāh ke gird phir kar

⁷buland āvāz se terī hamd-o-sanā kartā, tere tamām mojizāt kā elān kartā hūṅ.

⁸ai rabb, terī sukūnatgāh mujhe piyārī hai, jis jagah terā jalāl ṭhahartā hai vah mujhe azīz hai.

⁹merī jān ko mujh se chhīn kar mujhe gunāhgāroṅ meṅ shāmil na kar! merī zindagī ko miṭā kar mujhe ḵẖūṅḵẖwāroṅ meṅ shumār na kar,

¹⁰aise logoṅ meṅ jin ke hāth sharmanāk harkatoṅ se ālūdā haiṅ, jo har vaqt rishvat khāte haiṅ.

¹¹kyūṅki maiṅ begunāh zindagī guzārtā hūṅ. fidyā de kar mujhe chhuṭkārā de! mujh par meharbānī kar!

¹²mere pāoṅ hamvār zamīn par qāim ho gae haiṅ, aur maiṅ ijatimāoṅ meṅ rabb kī sitāish karūṅgā.