Zabūr 33

¹ai rāstbāzo, rabb kī ḵẖushī manāo! kyūṅki munāsib hai ki sīdhī rāh par chalne vāle us kī sitāish kareṅ.

²sarod bajā kar rabb kī hamd-o-sanā karo. us kī tamjīd meṅ das tāroṅ vālā sāz bajāo.

³us kī tamjīd meṅ nayā gīt gāo, mahārat se sāz bajā kar ḵẖushī ke nāre lagāo.

⁴kyūṅki rabb kā kalām sacchā hai, aur vah har kām vafādārī se kartā hai.

⁵use rāstbāzī aur insāf piyāre haiṅ, duniyā rabb kī shafqat se bharī huī hai.

⁶rabb ke kahane par āsmān ḵẖalaq huā, us ke muṅh ke dam se sitāroṅ kā pūrā lashkar vujūd meṅ āyā.

⁷vah samundar ke pānī kā baṛā ḍher jamā kartā, pānī kī gaharāiyoṅ ko godāmoṅ meṅ mahfūz rakhtā hai.

⁸kul duniyā rabb kā ḵẖauf māne, zamīn ke tamām bāshinde us se dahshat khāeṅ.

⁹kyūṅki us ne farmāyā to fauran vujūd meṅ āyā, us ne hukm diyā to usī vaqt qāim huā.

¹⁰rabb aqvām kā mansūbā nākām hone detā, vah ummatoṅ ke irādoṅ ko shikast detā hai.

¹¹lekin rabb kā mansūbā hameshā tak kāmyāb rahatā, us ke dil ke irāde pusht-dar-pusht qāim rahate haiṅ.

¹²mubārak hai vah qaum jis kā ḵẖudā rabb hai, vah qaum jise us ne chun kar apnī mīrās banā liyā hai.

¹³rabb āsmān se nazar ḍāl kar tamām insānoṅ kā mulāhazā kartā hai.

¹⁴apne taḵẖt se vah zamīn ke tamām bāshindoṅ kā muāinā kartā hai.

¹⁵jis ne un sab ke diloṅ ko tashkīl diyā vah un ke tamām kāmoṅ par dhyān detā hai.

¹⁶bādshāh kī baṛī fauj use nahīṅ chhuṛātī, aur sūrme kī baṛī tāqat use nahīṅ bachātī.

¹⁷ghoṛā bhī madad nahīṅ kar saktā. jo us par ummīd rakhe vah dhokā khāegā. us kī baṛī tāqat chhuṭkārā nahīṅ detī.

¹⁸yaqīnan rabb kī āṅkh un par lagī rahatī hai jo us kā ḵẖauf mānte aur us kī meharbānī ke intizār meṅ rahate haiṅ,

¹⁹ki vah un kī jān maut se bachāe aur kāl meṅ mahfūz rakhe.

²⁰hamārī jān rabb ke intizār meṅ hai. vahī hamārā sahārā, hamārī ḍhāl hai.

²¹hamārā dil us meṅ ḵẖush hai, kyūṅki ham us ke muqaddas nām par bharosā rakhte haiṅ.

²²ai rabb, terī meharbānī ham par rahe, kyūṅki ham tujh par ummīd rakhte haiṅ.