Zabūr 34

allāh kī hifāzat

¹dāūd kā yah zabūr us vaqt se mutālliq hai jab us ne filistī bādshāh abīmlik ke sāmne pāgal banne kā rūp bhar liyā. yah dekh kar bādshāh ne use bhagā diyā. chale jāne ke bād dāūd ne yah gīt gāyā.

har vaqt maiṅ rabb kī tamjīd karūṅgā, us kī hamd-o-sanā hameshā hī mere hoṅṭoṅ par rahegī.

²merī jān rabb par faḵẖar karegī. musībatzadā yah sun kar ḵẖush ho jāeṅ.

³āo, mere sāth rabb kī tāzīm karo. āo, ham mil kar us kā nām sarbuland kareṅ.

⁴maiṅ ne rabb ko talāsh kiyā to us ne merī sunī. jin chīzoṅ se maiṅ dahshat khā rahā thā un sab se us ne mujhe rihāī dī.

⁵jin kī āṅkheṅ us par lagī raheṅ vah ḵẖushī se chamkeṅge, aur un ke muṅh sharmindā nahīṅ hoṅge.

⁶is nāchār ne pukārā to rabb ne us kī sunī, us ne use us kī tamām musībatoṅ se najāt dī.

⁷jo rabb kā ḵẖauf māneṅ un ke ird-gird us kā farishtā ḵẖaimāzan ho kar un ko bachāe rakhtā hai.

⁸rabb kī bhalāī kā tajribā karo. mubārak hai vah jo us meṅ panāh le.

⁹ai rabb ke muqaddasīn, us kā ḵẖauf māno, kyūṅki jo us kā ḵẖauf māneṅ unheṅ kamī nahīṅ.

¹⁰javān sherbabar kabhī zarūratmand aur bhūke hote haiṅ, lekin rabb ke tāliboṅ ko kisī bhī acchhī chīz kī kamī nahīṅ hogī.

¹¹ai baccho, āo, merī bāteṅ suno! maiṅ tumheṅ rabb ke ḵẖauf kī tālīm dūṅgā.

¹²kaun maze se zindagī guzārnā aur acchhe din dekhnā chāhatā hai?

¹³vah apnī zabān ko sharīr bāteṅ karne se roke aur apne hoṅṭoṅ ko jhūṭ bolne se.

¹⁴vah burāī se muṅh pher kar nek kām kare, sulah-salāmatī kā tālib ho kar us ke pīchhe lagā rahe.

¹⁵rabb kī āṅkheṅ rāstbāzoṅ par lagī rahatī haiṅ, aur us ke kān un kī iltijāoṅ kī taraf māil haiṅ.

¹⁶lekin rabb kā chiharā un ke ḵẖilāf hai jo ġalat kām karte haiṅ. un kā zamīn par nām-o-nishān tak nahīṅ rahegā.

¹⁷jab rāstbāz faryād kareṅ to rabb un kī suntā, vah unheṅ un kī tamām musībat se chhuṭkārā detā hai.

¹⁸rabb shikastādiloṅ ke qarīb hotā hai, vah unheṅ rihāī detā hai jin kī rūh ko ḵẖāk meṅ kuchlā gayā ho.

¹⁹rāstbāz kī mut’addid takālīf hotī haiṅ, lekin rabb use un sab se bachā letā hai.

²⁰vah us kī tamām haḍḍiyoṅ kī hifāzat kartā hai, ek bhī nahīṅ toṛī jāegī.

²¹burāī bedīn ko mār ḍālegī, aur jo rāstbāz se nafrat kare use munāsib ajr milegā.

²²lekin rabb apne ḵẖādimoṅ kī jān kā fidyā degā. jo bhī us meṅ panāh le use sazā nahīṅ milegī.