Zabūr 36

¹rabb ke ḵẖādim dāūd kā zabūr. mūsīqī ke rāhanumā ke liye.

badkārī bedīn ke dil hī meṅ us se bāt kartī hai. us kī āṅkhoṅ ke sāmne allāh kā ḵẖauf nahīṅ hotā,

²kyūṅki us kī nazar meṅ yah bāt faḵẖar kā bāis hai ki use qusūrvār pāyā gayā, ki vah nafrat kartā hai.

³us ke muṅh se sharārat aur fareb nikaltā hai, vah samajhdār hone aur nek kām karne se bāz āyā hai.

⁴apne bistar par bhī vah sharārat ke mansūbe bāṅdhtā hai. vah mazbūtī se burī rāh par khaṛā rahatā aur burāī ko mustarad nahīṅ kartā.

⁵ai rabb, terī shafqat āsmān tak, terī vafādārī bādloṅ tak pahuṅchtī hai.

⁶terī rāstī bulandtarīn pahāṛoṅ kī mānind, terā insāf samundar kī gaharāiyoṅ jaisā hai. ai rabb, tū insān-o-haivān kī madad kartā hai.

⁷ai allāh, terī shafqat kitnī beshaqīmat hai! ādamzād tere paroṅ ke sāy meṅ panāh lete haiṅ.

⁸vah tere ghar ke umdā khāne se tar-o-tāzā ho jāte haiṅ, aur tū unheṅ apnī ḵẖushiyoṅ kī nadī meṅ se pilātā hai.

⁹kyūṅki zindagī kā sarchashmā tere hī pās hai, aur ham tere nūr meṅ rah kar nūr kā mushāhadā karte haiṅ.

¹⁰apnī shafqat un par phailāe rakh jo tujhe jānte haiṅ, apnī rāstī un par jo dil se diyānatdār haiṅ.

¹¹maġrūroṅ kā pāoṅ mujh tak na pahuṅche, bedīnoṅ kā hāth mujhe beghar na banāe.

¹²dekho, badkār gir gae haiṅ! unheṅ zamīn par paṭaḵẖ diyā gayā hai, aur vah dubārā kabhī nahīṅ uṭheṅge.