Zabūr 37
bedīnoṅ kī bazāhir ḵẖushhālī
1dāūd kā zabūr.
sharīroṅ ke bāis bechain na ho jā, badkāroṅ par rashak na kar.
2kyūṅki vah ghās kī tarah jald hī murjhā jāeṅge, hariyālī kī tarah jald hī sūkh jāeṅge.
3rabb par bharosā rakh kar bhalāī kar, mulk meṅ rah kar vafādārī kī parvarish kar.
4rabb se lutf’andoz ho to jo terā dil chāhe vah tujhe degā.
5apnī rāh rabb ke sapurd kar. us par bharosā rakh to vah tujhe kāmyābī baḵẖshegā.
6tab vah terī rāstbāzī sūraj kī tarah tulū hone degā aur terā insāf dopahar kī raushnī kī tarah chamakne degā.
7rabb ke huzūr chup ho kar sabr se us kā intizār kar. beqarār na ho agar sāzisheṅ karne vālā kāmyāb ho.
8ḵẖafā hone se bāz ā, ġusse ko chhoṛ de. raṅjīdā na ho, varnā burā hī natījā niklegā.
9kyūṅki sharīr miṭ jāeṅge jabki rabb se ummīd rakhne vāle mulk ko mīrās meṅ pāeṅge.
10mazīd thoṛī der sabr kar to bedīn kā nām-o-nishān miṭ jāegā. tū us kā khoj lagāegā, lekin kahīṅ nahīṅ pāegā.
11lekin halīm mulk ko mīrās meṅ pā kar baṛe amn aur sukūn se lutf’andoz hoṅge.
12beshak bedīn dāṅt pīs pīs kar rāstbāz ke ḵẖilāf sāzisheṅ kartā rahe.
13lekin rabb us par haṅstā hai, kyūṅki vah jāntā hai ki us kā anjām qarīb hī hai.
14bedīnoṅ ne talvār ko khaiṅchā aur kamān ko tān liyā hai tāki nāchāroṅ aur zarūratmandoṅ ko girā deṅ aur sīdhī rāh par chalne vāloṅ ko qatl kareṅ.
15lekin un kī talvār un ke apne dil meṅ ghoṁpī jāegī, un kī kamān ṭūṭ jāegī.
16rāstbāz ko jo thoṛā bahut hāsil hai vah bahut bedīnoṅ kī daulat se behatar hai.
17kyūṅki bedīnoṅ kā bāzū ṭūṭ jāegā jabki rabb rāstbāzoṅ ko saṁbhāltā hai.
18rabb beilzāmoṅ ke din jāntā hai, aur un kī maurūsī milkiyat hameshā ke liye qāim rahegī.
19musībat ke vaqt vah sharmasār nahīṅ hoṅge, kāl bhī paṛe to ser hoṅge.
20lekin bedīn halāk ho jāeṅge, aur rabb ke dushman charāgāhoṅ kī shān kī tarah nest ho jāeṅge, dhueṅ kī tarah ġāib ho jāeṅge.
21bedīn qarz letā aur use nahīṅ utārtā, lekin rāstbāz meharbān hai aur fayyāzī se detā hai.
22kyūṅki jinheṅ rabb barkat de vah mulk ko mīrās meṅ pāeṅge, lekin jin par vah lānat bheje un kā nām-o-nishān tak nahīṅ rahegā.
23agar kisī ke pāoṅ jam jāeṅ to yah rabb kī taraf se hai. aise shaḵẖs kī rāh ko vah pasand kartā hai.
24agar gir bhī jāe to paṛā nahīṅ rahegā, kyūṅki rabb us ke hāth kā sahārā banā rahegā.
25maiṅ javān thā aur ab būṛhā ho gayā hūṅ. lekin maiṅ ne kabhī nahīṅ dekhā ki rāstbāz ko tark kiyā gayā yā us ke bacchoṅ ko bhīk māṅgnī paṛī.
26vah hameshā meharbān aur qarz dene ke liye tayyār hai. us kī aulād barkat kā bāis hogī.
27burāī se bāz ā kar bhalāī kar. tab tū hameshā ke liye mulk meṅ ābād rahegā,
28kyūṅki rabb ko insāf piyārā hai, aur vah apne īmāndāroṅ ko kabhī tark nahīṅ karegā. vah abad tak mahfūz raheṅge jabki bedīnoṅ kī aulād kā nām-o-nishān tak nahīṅ rahegā.
29rāstbāz mulk ko mīrās meṅ pā kar us meṅ hameshā baseṅge.
30rāstbāz kā muṅh hikmat bayān kartā aur us kī zabān se insāf nikaltā hai.
31allāh kī sharīat us ke dil meṅ hai, aur us ke qadam kabhī nahīṅ ḍagmagāeṅge.
32bedīn rāstbāz kī tāk meṅ baiṭh kar use mār ḍālne kā mauqā ḍhūṅḍtā hai.
33lekin rabb rāstbāz ko us ke hāth meṅ nahīṅ chhoṛegā, vah use adālat meṅ mujrim nahīṅ ṭhaharne degā.
34rabb ke intizār meṅ rah aur us kī rāh par chaltā rah. tab vah tujhe sarfarāz karke mulk kā vāris banāegā, aur tū bedīnoṅ kī halākat dekhegā.
35maiṅ ne ek bedīn aur zālim ādmī ko dekhā jo phalte phūlte deodār ke daraḵẖt kī tarah āsmān se bāteṅ karne lagā.
36lekin thoṛī der ke bād jab maiṅ dubārā vahāṅ se guzrā to vah thā nahīṅ. maiṅ ne us kā khoj lagāyā, lekin kahīṅ na milā.
37beilzām par dhyān de aur diyānatdār par ġaur kar, kyūṅki āḵẖirkār use amn aur sukūn hāsil hogā.
38lekin mujrim mil kar tabāh ho jāeṅge, aur bedīnoṅ ko āḵẖirkār rū-e-zamīn par se miṭāyā jāegā.
39rāstbāzoṅ kī najāt rabb kī taraf se hai, musībat ke vaqt vahī un kā qil’ā hai.
40rabb hī un kī madad karke unheṅ chhuṭkārā degā, vahī unheṅ bedīnoṅ se bachā kar najāt degā. kyūṅki unhoṅ ne us meṅ panāh lī hai.