Zabūr 41

marīz kī duā

¹dāūd kā zabūr. mūsīqī ke rāhanumā ke liye.

mubārak hai vah jo pastahāl kā ḵẖayāl rakhtā hai. musībat ke din rabb use chhuṭkārā degā.

²rabb us kī hifāzat karke us kī zindagī ko mahfūz rakhegā, vah mulk meṅ use barkat de kar use us ke dushmanoṅ ke lālach ke havāle nahīṅ karegā.

³bīmārī ke vaqt rabb us ko bistar par saṁbhālegā . tū us kī sehat pūrī tarah bahāl karegā.

⁴maiṅ bolā, “ai rabb, mujh par raham kar! mujhe shifā de, kyūṅki maiṅ ne terā hī gunāh kiyā hai.”

⁵mere dushman mere bāre meṅ ġalat bāteṅ karke kahate haiṅ, “vah kab maregā? us kā nām-o-nishān kab miṭegā?”

⁶jab kabhī koī mujh se milne āe to us kā dil jhūṭ boltā hai. pas-e-pardā vah aisī nuqsāndih mālūmāt jamā kartā hai jinheṅ bād meṅ bāhar jā kar galiyoṅ meṅ phailā sake.

⁷mujh se nafrat karne vāle sab āpas meṅ mere ḵẖilāf phusaphusāte haiṅ. vah mere ḵẖilāf bure mansūbe bāṅdh kar kahate haiṅ,

⁸“use muhalak marz lag gayā hai. vah kabhī apne bistar par se dubārā nahīṅ uṭhegā.”

⁹merā dost bhī mere ḵẖilāf uṭh khaṛā huā hai. jis par maiṅ etimād kartā thā aur jo merī roṭī khātā thā, us ne mujh par lāt uṭhāī hai.

¹⁰lekin tū ai rabb, mujh par meharbānī kar! mujhe dubārā uṭhā khaṛā kar tāki unheṅ un ke sulūk kā badlā de sakūṅ.

¹¹is se maiṅ jāntā hūṅ ki tū mujh se ḵẖush hai ki merā dushman mujh par fatah ke nāre nahīṅ lagātā.

¹²tū ne mujhe merī diyānatdārī ke bāis qāim rakhā aur hameshā ke liye apne huzūr khaṛā kiyā hai.

¹³rabb kī hamd ho jo isrāīl kā ḵẖudā hai. azal se abad tak us kī tamjīd ho. āmīn, phir āmīn.