dūsrī kitāb 42-72

pardes meṅ allāh kā ārzūmand

¹qorah kī aulād kā zabūr. hikmat kā gīt. mūsīqī ke rāhanumā ke liye.

ai allāh, jis tarah hirnī nadiyoṅ ke tāzā pānī ke liye taṛaptī hai usī tarah merī jān tere liye taṛaptī hai.

²merī jān ḵẖudā, hāṅ zindā ḵẖudā kī piyāsī hai. maiṅ kab jā kar allāh kā chiharā dekhūṅgā?

³din rāt mere āṅsū merī ġizā rahe haiṅ. kyūṅki pūrā din mujh se kahā jātā hai, “terā ḵẖudā kahāṅ hai?”

⁴pahale hālāt yād karke maiṅ apne sāmne apne dil kī āh-o-zārī uṅḍel detā hūṅ. ^[a] lafzī tarjumā : apnī jān uṅḍel detā hūṅ. kitnā mazā ātā thā jab hamārā julūs nikaltā thā, jab maiṅ hujūm ke bīch meṅ ḵẖushī aur shukrguzārī ke nāre lagāte hue allāh kī sukūnatgāh kī jānib baṛhtā jātā thā. kitnā shor mach jātā thā jab ham jashn manāte hue ghūmte phirte the.

⁵ai merī jān, tū ġam kyūṅ khā rahī hai, bechainī se kyūṅ taṛap rahī hai? allāh ke intizār meṅ rah, kyūṅki maiṅ dubārā us kī sitāish karūṅgā jo merā ḵẖudā hai aur mere dekhte dekhte mujhe najāt detā hai.

⁶merī jān ġam ke māre pighal rahī hai. is liye maiṅ tujhe yardan ke mulk, harmūn ke pahāṛī silsile aur koh-e-mis’ār se yād kartā hūṅ.

⁷jab se tere ābshāroṅ kī āvāz buland huī to ek sailāb dūsre ko pukārne lagā hai. terī tamām maujeṅ aur lahareṅ mujh par se guzar gaī haiṅ.

⁸din ke vaqt rabb apnī shafqat bhejegā, aur rāt ke vaqt us kā gīt mere sāth hogā, maiṅ apnī hayāt ke ḵẖudā se duā karūṅgā.

⁹maiṅ allāh apnī chaṭān se kahūṅgā, “tū mujhe kyūṅ bhūl gayā hai? maiṅ apne dushman ke zulm ke bāis kyūṅ mātmī libās pahane phirūṅ?”

¹⁰mere dushmanoṅ kī lān-tān se merī haḍḍiyāṅ ṭūṭ rahī haiṅ, kyūṅki pūrā din vah kahate haiṅ, “terā ḵẖudā kahāṅ hai?”

¹¹ai merī jān, tū ġam kyūṅ khā rahī hai, bechainī se kyūṅ taṛap rahī hai? allāh ke intizār meṅ rah, kyūṅki maiṅ dubārā us kī sitāish karūṅgā jo merā ḵẖudā hai aur mere dekhte dekhte mujhe najāt detā hai.