Zabūr 44

kyā allāh ne apnī qaum ko radd kiyā hai?

¹qorah kī aulād kā zabūr. hikmat kā gīt. mūsīqī ke rāhanumā ke liye.

ai allāh, jo kuchh tū ne hamāre bāpdādā ke ayyām meṅ yānī qadīm zamāne meṅ kiyā vah ham ne apne kānoṅ se un se sunā hai.

²tū ne ḵẖud apne hāth se dīgar qaumoṅ ko nikāl kar hamāre bāpdādā ko mulk meṅ paude kī tarah lagā diyā. tū ne ḵẖud dīgar ummatoṅ ko shikast de kar hamāre bāpdādā ko mulk meṅ phalne phūlne diyā.

³unhoṅ ne apnī hī talvār ke zarīe mulk par qabzā nahīṅ kiyā, apne hī bāzū se fatah nahīṅ pāī balki tere dahane hāth, tere bāzū aur tere chihare ke nūr ne yah sab kuchh kiyā. kyūṅki vah tujhe pasand the.

⁴tū merā bādshāh, merā ḵẖudā hai. tere hī hukm par yāqūb ko madad hāsil hotī hai.

⁵terī madad se ham apne dushmanoṅ ko zamīn par paṭaḵẖ dete, terā nām le kar apne muḵẖālifoṅ ko kuchal dete haiṅ.

⁶kyūṅki maiṅ apnī kamān par etimād nahīṅ kartā, aur merī talvār mujhe nahīṅ bachāegī

⁷balki tū hī hameṅ dushman se bachātā, tū hī unheṅ sharmindā hone detā hai jo ham se nafrat karte haiṅ.

⁸pūrā din ham allāh par faḵẖar karte haiṅ, aur ham hameshā tak tere nām kī tamjīd kareṅge. (silāh)

⁹lekin ab tū ne hameṅ radd kar diyā, hameṅ sharmindā hone diyā hai. jab hamārī faujeṅ laṛne ke liye nikaltī haiṅ to tū un kā sāth nahīṅ detā.

¹⁰tū ne hameṅ dushman ke sāmne paspā hone diyā, aur jo ham se nafrat karte haiṅ unhoṅ ne hameṅ lūṭ liyā hai.

¹¹tū ne hameṅ bheṛ-bakriyoṅ kī tarah qassāb ke hāth meṅ chhoṛ diyā, hameṅ muḵẖtalif qaumoṅ meṅ muntashir kar diyā hai.

¹²tū ne apnī qaum ko ḵẖafīf sī raqam ke liye bech ḍālā, use faroḵẖt karne se nafā hāsil na huā.

¹³yah terī taraf se huā ki hamāre paṛosī hameṅ rusvā karte, gird-o-navāh ke log hameṅ lān-tān karte haiṅ.

¹⁴ham aqvām meṅ ibrat’aṅgez misāl ban gae haiṅ. log hameṅ dekh kar taubā taubā kahate haiṅ.

¹⁵din bhar merī rusvāī merī āṅkhoṅ ke sāmne rahatī hai. merā chiharā sharmasār hī rahatā hai,

¹⁶kyūṅki mujhe un kī gāliyāṅ aur kufr sunnā paṛtā hai, dushman aur intiqām lene par tule hue ko bardāsht karnā paṛtā hai.

¹⁷yah sab kuchh ham par ā gayā hai, hālāṅki na ham tujhe bhūl gae aur na tere ahd se bevafā hue haiṅ.

¹⁸na hamārā dil bāġī ho gayā, na hamāre qadam terī rāh se bhaṭak gae haiṅ.

¹⁹tāham tū ne hameṅ chūr chūr karke gīdṛoṅ ke darmiyān chhoṛ diyā, tū ne hameṅ gaharī tārīkī meṅ ḍūbne diyā hai.

²⁰agar ham apne ḵẖudā kā nām bhūl kar apne hāth kisī aur mābūd kī taraf uṭhāte

²¹to kyā allāh ko yah bāt mālūm na ho jātī? zarūr! vah to dil ke rāzoṅ se vāqif hotā hai.

²²lekin terī ḵẖātir hameṅ din bhar maut kā sāmnā karnā paṛtā hai, log hameṅ zabah hone vālī bheṛoṅ ke barābar samajhte haiṅ.

²³ai rabb, jāg uṭh! tū kyūṅ soyā huā hai? hameṅ hameshā ke liye radd na kar balki hamārī madad karne ke liye khaṛā ho jā.

²⁴tū apnā chiharā ham se poshīdā kyūṅ rakhtā hai, hamārī musībat aur ham par hone vāle zulm ko nazar’andāz kyūṅ kartā hai?

²⁵hamārī jān ḵẖāk meṅ dab gaī, hamārā badan miṭṭī se chimaṭ gayā hai.

²⁶uṭh kar hamārī madad kar! apnī shafqat kī ḵẖātir fidyā de kar hameṅ chhuṛā