Zabūr 45
bādshāh kī shādī
1qorah kī aulād kā zabūr. hikmat aur muhabbat kā gīt. tarz : sosan ke phūl. mūsīqī ke rāhanumā ke liye.
mere dil se ḵẖūbsūrat gīt chhalak rahā hai, maiṅ use bādshāh ko pesh karūṅgā. merī zabān māhir kātib ke qalam kī mānind ho!
2tū ādmiyoṅ meṅ sab se ḵẖūbsūrat hai! tere hoṅṭ shafqat se masah kie hue haiṅ, is liye allāh ne tujhe abdī barkat dī hai.
3ai sūrme, apnī talvār se kamarbastā ho, apnī shān-o-shaukat se mulabbas ho jā!
4ġalbā aur kāmyābī hāsil kar. sacchāī, inkisārī aur rāstī kī ḵẖātir laṛne ke liye nikal ā. terā dahanā hāth tujhe hairat’aṅgez kām dikhāe.
5tere tez tīr bādshāh ke dushmanoṅ ke diloṅ ko chhed ḍāleṅ. qaumeṅ tere pāoṅ meṅ gir jāeṅ.
6ai allāh, terā taḵẖt azal se abad tak qāim-o-dāim rahegā, aur insāf kā shāhī asā terī bādshāhī par hukūmat karegā.
7tū ne rāstbāzī se muhabbat aur bedīnī se nafrat kī, is liye allāh tere ḵẖudā ne tujhe ḵẖushī ke tel se masah karke tujhe tere sāthiyoṅ se kahīṅ ziyādā sarfarāz kar diyā.
8mur, ūd aur amalatās kī beshaqīmat ḵẖushbū tere tamām kapṛoṅ se phailtī hai. hāthīdāṅt ke mahaloṅ meṅ tārdār mūsīqī terā dil bahalātī hai.
9bādshāhoṅ kī beṭiyāṅ tere zevrāt se sajī phirtī haiṅ. malikā ofīr kā sonā pahane hue tere dahane hāth khaṛī hai.
10ai beṭī, sun merī bāt! ġaur kar aur kān lagā. apnī qaum aur apne bāp kā ghar bhūl jā.
11bādshāh tere husn kā ārzūmand hai, kyūṅki vah terā āqā hai. chunāṅche jhuk kar us kā ehatirām kar.
12sūr kī beṭī tuhfā le kar āegī, qaum ke amīr terī nazar-e-karam hāsil karne kī koshish kareṅge.
13bādshāh kī beṭī kitnī shāndār chīzoṅ se ārāstā hai. us kā libās sone ke dhāgoṅ se bunā huā hai.
14use nafīs raṅgdār kapṛe pahane bādshāh ke pās lāyā jātā hai. jo kuṅvārī saheliyāṅ us ke pīchhe chaltī haiṅ unheṅ bhī tere sāmne lāyā jātā hai.
15log shādmān ho kar aur ḵẖushī manāte hue unheṅ vahāṅ pahuṅchāte haiṅ, aur vah shāhī mahal meṅ dāḵẖil hotī haiṅ.
16ai bādshāh, tere beṭe tere bāpdādā kī jagah khaṛe ho jāeṅge, aur tū unheṅ raīs banā kar pūrī duniyā meṅ zimmādāriyāṅ degā.
17pusht-dar-pusht maiṅ tere nām kī tamjīd karūṅgā, is liye qaumeṅ hameshā tak terī sitāish kareṅgī.