Zabūr 46
allāh hamārī quvvat hai
1qorah kī aulād kā zabūr. mūsīqī ke rāhanumā ke liye. gīt kā tarz : kuṅvāriyāṅ.
allāh hamārī panāhgāh aur quvvat hai. musībat ke vaqt vah hamārā mazbūt sahārā sābit huā hai.
2is liye ham ḵẖauf nahīṅ khāeṅge, go zamīn laraz uṭhe aur pahāṛ jhūm kar samundar kī gaharāiyoṅ meṅ gir jāeṅ,
3go samundar shor machā kar ṭhāṭheṅ māre aur pahāṛ us kī dahāṛoṅ se kāṁp uṭheṅ. (silāh)
4daryā kī shāḵẖeṅ allāh ke shahar ko ḵẖush kartī haiṅ, us shahar ko jo allāh t’ālā kī muqaddas sukūnatgāh hai.
5allāh us ke bīch meṅ hai, is liye shahar nahīṅ ḍagmagāegā. subah-savere hī allāh us kī madad karegā.
6qaumeṅ shor machāne, saltanateṅ laṛkhaṛāne lagīṅ. allāh ne āvāz dī to zamīn laraz uṭhī.
7rabb-ul-afwāj hamāre sāth hai, yāqūb kā ḵẖudā hamārā qil’ā hai. (silāh)
8āo, rabb ke azīm kāmoṅ par nazar ḍālo! usī ne zamīn par haulnāk tabāhī nāzil kī hai.
9vahī duniyā kī intihā tak jaṅgeṅ rok detā, vahī kamān ko toṛ detā, neze ko ṭukṛe ṭukṛe kartā aur ḍhāl ko jalā detā hai.
10vah farmātā hai, “apnī harkatoṅ se bāz āo! jān lo ki maiṅ ḵẖudā hūṅ. maiṅ aqvām meṅ sarbuland aur duniyā meṅ sarfarāz hūṅgā.”
11rabb-ul-afwāj hamāre sāth hai. yāqūb kā ḵẖudā hamārā qil’ā hai. (silāh