Zabūr 47
allāh tamām qaumoṅ kā bādshāh hai
1qorah kī aulād kā zabūr. mūsīqī ke rāhanumā ke liye.
ai tamām qaumo, tālī bajāo! ḵẖushī ke nāre lagā kar allāh kī madahsarāī karo!
2kyūṅki rabb t’ālā purjalāl hai, vah pūrī duniyā kā azīm bādshāh hai.
3us ne qaumoṅ ko hamāre tahat kar diyā, ummatoṅ ko hamāre pāoṅ tale rakh diyā.
4us ne hamāre liye hamārī mīrās ko chun liyā, usī ko jo us ke piyāre bande yāqūb ke liye faḵẖar kā bāis thā. (silāh)
5allāh ne saūd farmāyā to sāth sāth ḵẖushī kā nārā buland huā, rabb bulandī par chaṛh gayā to sāth sāth narsiṅgā bajtā rahā.
6madahsarāī karo, allāh kī madahsarāī karo! madahsarāī karo, hamāre bādshāh kī madahsarāī karo!
7kyūṅki allāh pūrī duniyā kā bādshāh hai. hikmat kā gīt gā kar us kī sitāish karo.
8allāh qaumoṅ par hukūmat kartā hai, allāh apne muqaddas taḵẖt par baiṭhā hai.
9dīgar qaumoṅ ke shurfā ibrāhīm ke ḵẖudā kī qaum ke sāth jamā ho gae haiṅ, kyūṅki vah duniyā ke hukmarānoṅ kā mālik hai. vah nihāyat hī sarbuland hai.