Zabūr 48
allāh kā shahar yarūshalam
1gīt. qorah kī aulād kā zabūr.
rabb azīm aur baṛī tārīf ke lāiq hai. us kā muqaddas pahāṛ hamāre ḵẖudā ke shahar meṅ hai.
2koh-e-siyyūn kī bulandī ḵẖūbsūrat hai, pūrī duniyā us se ḵẖush hotī hai. koh-e-siyyūn dūrtarīn shimāl kā ilāhī pahāṛ hī hai, vah azīm bādshāh kā shahar hai.
3allāh us ke mahaloṅ meṅ hai, vah us kī panāhgāh sābit huā hai.
4kyūṅki dekho, bādshāh jamā ho kar yarūshalam se laṛne āe.
5lekin use dekhte hī vah hairān hue, vah dahshat khā kar bhāg gae.
6vahāṅ un par kapkapī tārī huī, aur vah dard-e-zah meṅ mubtalā aurat kī tarah pech-o-tāb khāne lage.
7jis tarah mashriqī āṅdhī tarsīs ke shāndār jahāzoṅ ko ṭukṛe ṭukṛe kar detī hai usī tarah tū ne unheṅ tabāh kar diyā.
8jo kuchh ham ne sunā hai vah hamāre dekhte dekhte rabb-ul-afwāj hamāre ḵẖudā ke shahar par sādiq āyā hai, allāh use abad tak qāim rakhegā. (silāh)
9ai allāh, ham ne terī sukūnatgāh meṅ terī shafqat par ġaur-o-ḵẖauz kiyā hai.
10ai allāh, terā nām is lāiq hai ki terī tārīf duniyā kī intihā tak kī jāe. terā dahanā hāth rāstī se bharā rahatā hai.
11koh-e-siyyūn shādmān ho, yahūdāh kī beṭiyāṅ [a] yahāṅ yahūdāh kī beṭiyoṅ se murād us ke shahar bhī ho sakte haiṅ. tere munsifānā faisloṅ ke bāis ḵẖushī manāeṅ.
12siyyūn ke ird-gird ghūmo phiro, us kī fasīl ke sāth sāth chal kar us ke burj gin lo.
13us kī qil’ābandī par ḵẖūb dhyān do, us ke mahaloṅ kā muāinā karo tāki āne vālī nasal ko sab kuchh sunā sako.
14yaqīnan allāh hamārā ḵẖudā hameshā tak aisā hī hai. vah abad tak hamārī rāhanumāī karegā.