Zabūr 49

amīroṅ kī shān sarāb hī hai

¹qorah kī aulād kā zabūr. mūsīqī ke rāhanumā ke liye.

ai tamām qaumo, suno! duniyā ke tamām bāshindo, dhyān do!

²chhoṭe aur baṛe, amīr aur ġarīb sab tavajjuh deṅ.

³merā muṅh hikmat bayān karegā aur mere dil kā ġaur-o-ḵẖauz samajh atā karegā.

⁴maiṅ apnā kān ek kahāvat kī taraf jhukāūṅgā, sarod bajā kar apnī pahelī kā hal batāūṅgā.

⁵maiṅ ḵẖauf kyūṅ khāūṅ jab musībat ke din āeṅ aur makkāroṅ kā burā kām mujhe gher le?

⁶aise log apnī milkiyat par etimād aur apnī baṛī daulat par faḵẖar karte haiṅ.

⁷koī bhī fidyā de kar apne bhāī kī jān ko nahīṅ chhuṛā saktā. vah allāh ko is qism kā tāvān nahīṅ de saktā.

⁸kyūṅki itnī baṛī raqam denā us ke bas kī bāt nahīṅ. āḵẖirkār use hameshā ke liye aisī koshishoṅ se bāz ānā paṛegā.

⁹chunāṅche koī bhī hameshā ke liye zindā nahīṅ rah saktā, āḵẖirkār har ek maut ke gaṛhe meṅ utregā.

¹⁰kyūṅki har ek dekh saktā hai ki dānishmand bhī vafāt pāte aur ahamaq aur nāsamajh bhī mil kar halāk ho jāte haiṅ. sab ko apnī daulat dūsroṅ ke liye chhoṛnī paṛtī hai.

¹¹un kī qabreṅ abad tak un ke ghar banī raheṅgī, pusht-dar-pusht vah un meṅ base raheṅge, go unheṅ zamīneṅ hāsil thīṅ jo un ke nām par thīṅ.

¹²insān apnī shān-o-shaukat ke bāvujūd qāim nahīṅ rahatā, use jānvaroṅ kī tarah halāk honā hai.

¹³yah un sab kī taqdīr hai jo apne āp par etimād rakhte haiṅ, aur un sab kā anjām jo un kī bāteṅ pasand karte haiṅ. (silāh)

¹⁴unheṅ bheṛ-bakriyoṅ kī tarah pātāl meṅ lāyā jāegā, aur maut unheṅ charāegī. kyūṅki subah ke vaqt diyānatdār un par hukūmat kareṅge. tab un kī shakl-o-sūrat ghise phaṭe kapṛe kī tarah gal saṛ jāegī, pātāl hī un kī rihāishgāh hogā.

¹⁵lekin allāh merī jān kā fidyā degā, vah mujhe pakaṛ kar pātāl kī girift se chhuṛāegā. (silāh)

¹⁶mat ghabrā jab koī amīr ho jāe, jab us ke ghar kī shān-o-shaukat baṛhtī jāe.

¹⁷marte vaqt to vah apne sāth kuchh nahīṅ le jāegā, us kī shān-o-shaukat us ke sāth pātāl meṅ nahīṅ utregī.

¹⁸beshak vah jīte jī apne āp ko mubārak kahegā, aur dūsre bhī khāte-pīte ādmī kī tārīf kareṅge.

¹⁹phir bhī vah āḵẖirkār apne bāpdādā kī nasal ke pās utregā, un ke pās jo dubārā kabhī raushnī nahīṅ dekheṅge.

²⁰jo insān apnī shān-o-shaukat ke bāvujūd nāsamajh hai, use jānvaroṅ kī tarah halāk honā hai.