Zabūr 50
sahīh ibādat
1āsaf kā zabūr.
rabb qādir-e-mutlaq ḵẖudā bol uṭhā hai, us ne tulū-e-subah se le kar ġurūb-e-āftāb tak pūrī duniyā ko bulāyā hai.
2allāh kā nūr siyyūn se chamak uṭhā hai, us pahāṛ se jo kāmil husn kā izhār hai.
3hamārā ḵẖudā ā rahā hai, vah ḵẖāmosh nahīṅ rahegā. us ke āge āge sab kuchh bhasm ho rahā hai, us ke ird-gird tez āṅdhī chal rahī hai.
4vah āsmān-o-zamīn ko āvāz detā hai, “ab maiṅ apnī qaum kī adālat karūṅgā.
5mere īmāndāroṅ ko mere huzūr jamā karo, unheṅ jinhoṅ ne qurbāniyāṅ pesh karke mere sāth ahd bāṅdhā hai.”
6āsmān us kī rāstī kā elān kareṅge, kyūṅki allāh ḵẖud insāf karne vālā hai. (silāh)
7“ai merī qaum, sun! mujhe bāt karne de. ai isrāīl, maiṅ tere ḵẖilāf gavāhī dūṅgā. maiṅ allāh terā ḵẖudā hūṅ.
8maiṅ tujhe terī zabah kī qurbāniyoṅ ke bāis malāmat nahīṅ kar rahā. terī bhasm hone vālī qurbāniyāṅ to musalsal mere sāmne haiṅ.
9na maiṅ tere ghar se bail lūṅgā, na tere bāṛoṅ se bakre.
10kyūṅki jaṅgal ke tamām jāndār mere hī haiṅ, hazāroṅ pahāṛiyoṅ par basne vāle jānvar mere hī haiṅ.
11maiṅ pahāṛoṅ ke har parinde ko jāntā hūṅ, aur jo bhī maidānoṅ meṅ harkat kartā hai vah merā hai.
12agar mujhe bhūk lagtī to maiṅ tujhe na batātā, kyūṅki zamīn aur jo kuchh us par hai merā hai.
13kyā tū samajhtā hai ki maiṅ sāṅḍoṅ kā gosht khānā yā bakroṅ kā ḵẖūn pīnā chāhatā hūṅ?
14allāh ko shukrguzārī kī qurbānī pesh kar, aur vah mannat pūrī kar jo tū ne allāh t’ālā ke huzūr mānī hai.
15musībat ke din mujhe pukār. tab maiṅ tujhe najāt dūṅgā aur tū merī tamjīd karegā.”
16lekin bedīn se allāh farmātā hai, “mere ahkām sunāne aur mere ahd kā zikr karne kā terā kyā haq hai?
17tū to tarbiyat se nafrat kartā aur mere farmān kachre kī tarah apne pīchhe phaiṅk detā hai.
18kisī chor ko dekhte hī tū us kā sāth detā hai, tū zinākāroṅ se rifāqat rakhtā hai.
19tū apne muṅh ko bure kām ke liye istemāl kartā, apnī zabān ko dhokā dene ke liye tayyār rakhtā hai.
20tū dūsroṅ ke pās baiṭh kar apne bhāī ke ḵẖilāf boltā hai, apnī hī māṅ ke beṭe par tuhamat lagātā hai.
21yah kuchh tū ne kiyā hai, aur maiṅ ḵẖāmosh rahā. tab tū samjhā ki maiṅ bilkul tujh jaisā hūṅ. lekin maiṅ tujhe malāmat karūṅgā, tere sāmne hī muāmalā tartīb se sunāūṅgā.
22tum jo allāh ko bhūle hue ho, bāt samajh lo, varnā maiṅ tumheṅ phāṛ ḍālūṅgā. us vaqt koī nahīṅ hogā jo tumheṅ bachāe.
23jo shukrguzārī kī qurbānī pesh kare vah merī tāzīm kartā hai. jo musammam irāde se aisī rāh par chale use maiṅ allāh kī najāt dikhāūṅgā.”