Zabūr 51
mujh jaise gunāhgār par raham kar! (taubā kā chauthā zabūr)
1dāūd kā zabūr. mūsīqī ke rāhanumā ke liye. yah gīt us vaqt se mutālliq hai jab dāūd ke bat-sabā ke sāth zinā karne ke bād nātan nabī us ke pās āyā.
ai allāh, apnī shafqat ke mutābiq mujh par meharbānī kar, apne baṛe raham ke mutābiq merī sarkashī ke dāġ miṭā de.
2mujhe dho de tāki merā qusūr dūr ho jāe, jo gunāh mujh se sarzad huā hai us se mujhe pāk kar.
3kyūṅki maiṅ apnī sarkashī ko māntā hūṅ, aur merā gunāh hameshā mere sāmne rahatā hai.
4maiṅ ne tere, sirf tere hī ḵẖilāf gunāh kiyā, maiṅ ne vah kuchh kiyā jo terī nazar meṅ burā hai. kyūṅki lāzim hai ki tū bolte vaqt rāst ṭhahare aur adālat karte vaqt pākīzā sābit ho jāe.
5yaqīnan maiṅ gunāh’ālūdā hālat meṅ paidā huā. jūṅ hī maiṅ māṅ ke peṭ meṅ vujūd meṅ āyā to gunāhgār thā.
6yaqīnan tū bātin kī sacchāī pasand kartā aur poshīdgī meṅ mujhe hikmat kī tālīm detā hai.
7zūfā le kar mujh se gunāh dūr kar tāki pāk-sāf ho jāūṅ. mujhe dho de tāki barf se ziyādā safed ho jāūṅ.
8mujhe dubārā ḵẖushī aur shādmānī sunne de tāki jin haḍḍiyoṅ ko tū ne kuchal diyā vah shādiyānā bajāeṅ.
9apne chihare ko mere gunāhoṅ se pher le, merā tamām qusūr miṭā de.
10ai allāh, mere andar pāk dil paidā kar, mujh meṅ nae sire se sābitqadam rūh qāim kar.
11mujhe apne huzūr se ḵẖārij na kar, na apne muqaddas rūh ko mujh se dūr kar.
12mujhe dubārā apnī najāt kī ḵẖushī dilā, mujhe mustaid rūh atā karke saṁbhāle rakh.
13tab maiṅ unheṅ terī rāhoṅ kī tālīm dūṅgā jo tujh se bevafā ho gae haiṅ, aur gunāhgār tere pās vāpas āeṅge.
14ai allāh, merī najāt ke ḵẖudā, qatl kā qusūr mujh se dūr karke mujhe bachā. tab merī zabān terī rāstī kī hamd-o-sanā karegī.
15ai rabb, mere hoṅṭoṅ ko khol tāki merā muṅh terī sitāish kare.
16kyūṅki tū zabah kī qurbānī nahīṅ chāhatā, varnā maiṅ vah pesh kartā. bhasm hone vālī qurbāniyāṅ tujhe pasand nahīṅ.
17allāh ko manzūr qurbānī shikastā rūh hai. ai allāh, tū shikastā aur kuchle hue dil ko haqīr nahīṅ jānegā.
18apnī meharbānī kā izhār karke siyyūn ko ḵẖushhālī baḵẖsh, yarūshalam kī fasīl tāmīr kar.
19tab tujhe hamārī sahīh qurbāniyāṅ, hamārī bhasm hone vālī aur mukammal qurbāniyāṅ pasand āeṅgī . tab terī qurbāngāh par bail chaṛhāe jāeṅge.