Zabūr 52
zulm ke bāvujūd tasallī
1dāūd kā zabūr. mūsīqī ke rāhanumā ke liye. hikmat kā yah gīt us vaqt se mutālliq hai jab doeg adomī sāūl bādshāh ke pās gayā aur use batāyā, “dāūd aḵẖīmlik imām ke ghar meṅ gayā hai.”
ai sūrme, tū apnī badī par kyūṅ faḵẖar kartā hai? allāh kī shafqat din bhar qāim rahatī hai.
2ai dhokebāz, terī zabān tez ustare kī tarah chaltī huī tabāhī ke mansūbe bāṅdhtī hai.
3tujhe bhalāī kī nisbat burāī ziyādā piyārī hai, sacch bolne kī nisbat jhūṭ ziyādā pasand hai. (silāh)
4ai farebdih zabān, tū har tabāhakun bāt se piyār kartī hai.
5lekin allāh tujhe hameshā ke liye ḵẖāk meṅ milāegā. vah tujhe mār mār kar tere ḵẖaime se nikāl degā, tujhe jaṛ se ukhāṛ kar zindoṅ ke mulk se ḵẖārij kar degā. (silāh)
6rāstbāz yah dekh kar ḵẖauf khāeṅge. vah us par haṅs kar kaheṅge,
7“lo, yah vah ādmī hai jis ne allāh meṅ panāh na lī balki apnī baṛī daulat par etimād kiyā, jo apne tabāhakun mansūboṅ se tāqatvar ho gayā thā.”
8lekin maiṅ allāh ke ghar meṅ zaitūn ke phalte phūlte daraḵẖt kī mānind hūṅ. maiṅ hameshā ke liye allāh kī shafqat par bharosā rakhūṅgā.
9maiṅ abad tak us ke liye terī sitāish karūṅgā jo tū ne kiyā hai. maiṅ tere īmāndāroṅ ke sāmne hī tere nām ke intizār meṅ rahūṅgā, kyūṅki vah bhalā hai.