Zabūr 53

bedīn kī hamāqat

¹dāūd kā zabūr. mūsīqī ke rāhanumā ke liye. hikmat kā gīt. tarz : mahalat.

ahamaq dil meṅ kahatā hai, “allāh hai hī nahīṅ!” aise log badachalan haiṅ, un kī harkateṅ qābil-e-ghin haiṅ. ek bhī nahīṅ hai jo acchhā kām kare.

²allāh ne āsmān se insān par nazar ḍālī tāki dekhe ki kyā koī samajhdār hai? kyā koī allāh kā tālib hai?

³afsos, sab sahīh rāh se bhaṭak gae, sab ke sab bigaṛ gae haiṅ. koī nahīṅ jo bhalāī kartā ho, ek bhī nahīṅ.

⁴kyā jo badī karke merī qaum ko roṭī kī tarah khā lete haiṅ unheṅ samajh nahīṅ ātī? vah to allāh ko pukārte hī nahīṅ.

⁵tab un par saḵẖt dahshat vahāṅ chhā gaī jahāṅ pahale dahshat kā sabab nahīṅ thā. jinhoṅ ne tujhe gher rakhā thā allāh ne un kī haḍḍiyāṅ bikher dīṅ. tū ne un ko rusvā kiyā, kyūṅki allāh ne unheṅ radd kiyā hai.

⁶kāsh koh-e-siyyūn se isrāīl kī najāt nikle! jab rabb apnī qaum ko bahāl karegā to yāqūb ḵẖushī ke nāre lagāegā, isrāīl bāġ bāġ hogā.