Zabūr 54

ḵẖatre meṅ phaṅse hue shaḵẖs kī iltijā

¹dāūd kā zabūr. hikmat kā yah gīt tārdār sāzoṅ ke sāth gānā hai. yah us vaqt se mutālliq hai jab zīf ke bāshindoṅ ne sāūl ke pās jā kar kahā, “dāūd hamāre pās chhupā huā hai.”

ai allāh, apne nām ke zarīe se mujhe chhuṭkārā de! apnī qudrat ke zarīe se merā insāf kar!

²ai allāh, merī iltijā sun, mere muṅh ke alfāz par dhyān de.

³kyūṅki pardesī mere ḵẖilāf uṭh khaṛe hue haiṅ, zālim jo allāh kā lihāz nahīṅ karte merī jān lene ke darpai haiṅ. (silāh)

⁴lekin allāh merā sahārā hai, rabb merī zindagī qāim rakhtā hai.

⁵vah mere dushmanoṅ kī sharārat un par vāpas lāegā. chunāṅche apnī vafādārī dikhā kar unheṅ tabāh kar de!

⁶maiṅ tujhe razākārānā qurbānī pesh karūṅgā. ai rabb, maiṅ tere nām kī sitāish karūṅgā, kyūṅki vah bhalā hai.

⁷kyūṅki us ne mujhe sārī musībat se rihāī dī, aur ab maiṅ apne dushmanoṅ kī shikast dekh kar ḵẖush hūṅgā.