Zabūr 55
jhūṭe bhāiyoṅ par shikāyat
1dāūd kā zabūr. mūsīqī ke rāhanumā ke liye. hikmat kā yah gīt tārdār sāzoṅ ke sāth gānā hai.
ai allāh, merī duā par dhyān de, apne āp ko merī iltijā se chhupāe na rakh.
2mujh par ġaur kar, merī sun. maiṅ bechainī se idhar udhar ghūmte hue āheṅ bhar rahā hūṅ.
3kyūṅki dushman shor machā rahā, bedīn mujhe taṅg kar rahā hai. vah mujh par āfat lāne par tule hue haiṅ, ġusse meṅ merī muḵẖālafat kar rahe haiṅ.
4merā dil mere andar taṛap rahā hai, maut kī dahshat mujh par chhā gaī hai.
5ḵẖauf aur larzish mujh par tārī huī, haibat mujh par ġālib ā gaī hai.
6maiṅ bolā, “kāsh mere kabūtar ke se par hoṅ tāki uṛ kar ārām-o-sukūn pā sakūṅ!
7tab maiṅ dūr tak bhāg kar registān meṅ baserā kartā,
8maiṅ jaldī se kahīṅ panāh letā jahāṅ tez āṅdhī aur tūfān se mahfūz rahatā.” (silāh)
9ai rabb, un meṅ abtarī paidā kar, un kī zabān meṅ iḵẖtilāf ḍāl! kyūṅki mujhe shahar meṅ har taraf zulm aur jhagṛe nazar āte haiṅ.
10din rāt vah fasīl par chakkar kāṭte haiṅ, aur shahar fasād aur ḵẖarābī se bharā rahatā hai.
11us ke bīch meṅ tabāhī kī hukūmat hai, aur zulm aur fareb us ke chauk ko nahīṅ chhoṛte.
12agar koī dushman merī rusvāī kartā to qābil-e-bardāsht hotā. agar mujh se nafrat karne vālā mujhe dabā kar apne āp ko sarfarāz kartā to maiṅ us se chhup jātā.
13lekin tū hī ne yah kiyā, tū jo mujh jaisā hai, jo merā qarībī dost aur hamrāz hai.
14merī tere sāth kitnī acchhī rifāqat thī jab ham hujūm ke sāth allāh ke ghar kī taraf chalte gae!
15maut achānak hī unheṅ apnī girift meṅ le le. zindā hī vah pātāl meṅ utar jāeṅ, kyūṅki burāī ne un meṅ apnā ghar banā liyā hai.
16lekin maiṅ pukār kar allāh se madad māṅgtā hūṅ, aur rabb mujhe najāt degā.
17maiṅ har vaqt āh-o-zārī kartā aur karāhatā rahatā hūṅ, ḵẖwāh subah ho, ḵẖwāh dopahar yā shām. aur vah merī sunegā.
18vah fidyā de kar merī jān ko un se chhuṛāegā jo mere ḵẖilāf laṛ rahe haiṅ. go un kī tādād baṛī hai vah mujhe ārām-o-sukūn degā.
19allāh jo azal se taḵẖtnashīn hai merī sun kar unheṅ munāsib javāb degā. (silāh) kyūṅki na vah tabdīl ho jāeṅge, na kabhī allāh kā ḵẖauf māneṅge.
20us shaḵẖs ne apnā hāth apne dostoṅ ke ḵẖilāf uṭhāyā, us ne apnā ahd toṛ liyā hai.
21us kī zabān par makkhan kī sī chiknī-chupṛī bāteṅ aur dil meṅ jaṅg hai. us ke tel se ziyādā narm alfāz haqīqat meṅ khaiṅchī huī talvāreṅ haiṅ.
22apnā bojh rabb par ḍāl to vah tujhe saṁbhālegā . vah rāstbāz ko kabhī ḍagmagāne nahīṅ degā.
23lekin ai allāh, tū unheṅ tabāhī ke gaṛhe meṅ utarne degā. ḵẖūṅḵẖār aur dhokebāz ādhī umr bhī nahīṅ pāeṅge balki jaldī mareṅge. lekin maiṅ tujh par bharosā rakhtā hūṅ.