Zabūr 56
musībat meṅ bharosā
1dāūd kā zabūr. mūsīqī ke rāhanumā ke liye. tarz : dūrdarāz jazīroṅ kā kabūtar. yah sunaharā gīt us vaqt se mutālliq hai jab filistiyoṅ ne use jāt meṅ pakaṛ liyā.
ai allāh, mujh par meharbānī kar! kyūṅki log mujhe taṅg kar rahe haiṅ, laṛne vālā din bhar mujhe satā rahā hai.
2din bhar mere dushman mere pīchhe lage haiṅ, kyūṅki vah bahut haiṅ aur ġarūr se mujh se laṛ rahe haiṅ.
3lekin jab ḵẖauf mujhe apnī girift meṅ le le to maiṅ tujh par hī bharosā rakhtā hūṅ.
4allāh ke kalām par merā faḵẖar hai, allāh par merā bharosā hai. maiṅ ḍarūṅgā nahīṅ, kyūṅki fānī insān mujhe kyā nuqsān pahuṅchā saktā hai?
5din bhar vah mere alfāz ko toṛ-maroṛ kar ġalat mānī nikālte, apne tamām mansūboṅ se mujhe zarar pahuṅchānā chāhate haiṅ.
6vah hamlāāvar ho kar tāk meṅ baiṭh jāte aur mere har qadam par ġaur karte haiṅ. kyūṅki vah mujhe mār ḍālne par tule hue haiṅ.
7jo aisī sharīr harkateṅ karte haiṅ, kyā unheṅ bachnā chāhie? hargiz nahīṅ! ai allāh, aqvām ko ġusse meṅ ḵẖāk meṅ milā de.
8jitne bhī din maiṅ beghar phirā hūṅ un kā tū ne pūrā hisāb rakhā hai. ai allāh, mere āṅsū apne mashkīze meṅ ḍāl le! kyā vah pahale se terī kitāb meṅ qalamband nahīṅ haiṅ? zarūr!
9phir jab maiṅ tujhe pukārūṅgā to mere dushman mujh se bāz āeṅge. yah maiṅ ne jān liyā hai ki allāh mere sāth hai!
10allāh ke kalām par merā faḵẖar hai, rabb ke kalām par merā faḵẖar hai.
11allāh par merā bharosā hai. maiṅ ḍarūṅgā nahīṅ, kyūṅki fānī insān mujhe kyā nuqsān pahuṅchā saktā hai?
12ai allāh, tere huzūr maiṅ ne mannateṅ mānī haiṅ, aur ab maiṅ tujhe shukrguzārī kī qurbāniyāṅ pesh karūṅgā.
13kyūṅki tū ne merī jān ko maut se bachāyā aur mere pāoṅ ko ṭhokar khāne se mahfūz rakhā tāki zindagī kī raushnī meṅ allāh ke huzūr chalūṅ.