Zabūr 57

āzmāish meṅ allāh par etimād

¹dāūd kā zabūr. mūsīqī ke rāhanumā ke liye. tarz : tabāh na kar. yah sunaharā gīt us vaqt se mutālliq hai jab vah sāūl se bhāg kar ġār meṅ chhup gayā.

ai allāh, mujh par meharbānī kar, mujh par meharbānī kar! kyūṅki merī jān tujh meṅ panāh letī hai. jab tak āfat mujh par se guzar na jāe maiṅ tere paroṅ ke sāy meṅ panāh lūṅgā.

²maiṅ allāh t’ālā ko pukārtā hūṅ, allāh se jo merā muāmalā ṭhīk karegā.

³vah āsmān se madad bhej kar mujhe chhuṭkārā degā aur un kī rusvāī karegā jo mujhe taṅg kar rahe haiṅ. (silāh) allāh apnā karam aur vafādārī bhejegā.

⁴maiṅ insān ko haṛap karne vāle sherbabroṅ ke bīch meṅ leṭā huā hūṅ, un ke darmiyān jin ke dāṅt neze aur tīr haiṅ aur jin kī zabān tez talvār hai.

⁵ai allāh, āsmān par sarbuland ho jā! terā jalāl pūrī duniyā par chhā jāe!

⁶unhoṅ ne mere qadmoṅ ke āge phaṅdā bichhā diyā, aur merī jān ḵẖāk meṅ dab gaī hai. unhoṅ ne mere sāmne gaṛhā khod liyā, lekin vah ḵẖud us meṅ gir gae haiṅ. (silāh)

⁷ai allāh, merā dil mazbūt, merā dil sābitqadam hai. maiṅ sāz bajā kar terī madahsarāī karūṅgā.

⁸ai merī jān, jāg uṭh! ai sitār aur sarod, jāg uṭho! āo, maiṅ tulū-e-subah ko jagāūṅ.

⁹ai rabb, qaumoṅ meṅ maiṅ terī sitāish, ummatoṅ meṅ terī madahsarāī karūṅgā.

¹⁰kyūṅki terī azīm shafqat āsmān jitnī buland hai, terī vafādārī bādloṅ tak pahuṅchtī hai.

¹¹ai allāh, āsmān par sarfarāz ho! terā jalāl pūrī duniyā par chhā jāe.