Zabūr 59
dushman ke darmiyān duā
1dāūd kā zabūr. mūsīqī ke rāhanumā ke liye. tarz : tabāh na kar. yah sunaharā gīt us vaqt se mutālliq hai jab sāūl ne apne ādmiyoṅ ko dāūd ke ghar kī paharādārī karne ke liye bhejā tāki jab mauqā mile use qatl kareṅ.
ai mere ḵẖudā, mujhe mere dushmanoṅ se bachā. un se merī hifāzat kar jo mere ḵẖilāf uṭhe haiṅ.
2mujhe badkāroṅ se chhuṭkārā de, ḵẖūṅḵẖwāroṅ se rihā kar.
3dekh, vah merī tāk meṅ baiṭhe haiṅ. ai rabb, zabardast ādmī mujh par hamlāāvar haiṅ, hālāṅki mujh se na ḵẖatā huī na gunāh.
4maiṅ bequsūr hūṅ, tāham vah dauṛ dauṛ kar mujh se laṛne kī tayyāriyāṅ kar rahe haiṅ. chunāṅche jāg uṭh, merī madad karne ā, jo kuchh ho rahā hai us par nazar ḍāl.
5ai rabb, lashkaroṅ aur isrāīl ke ḵẖudā, dīgar tamām qaumoṅ ko sazā dene ke liye jāg uṭh! un sab par karam na farmā jo sharīr aur ġaddār haiṅ. (silāh)
6har shām ko vah vāpas ā jāte aur kuttoṅ kī tarah bhauṅkte hue shahar kī galiyoṅ meṅ ghūmte phirte haiṅ.
7dekh, un ke muṅh se rāl ṭapak rahī hai, un ke hoṅṭoṅ se talvāreṅ nikal rahī haiṅ. kyūṅki vah samajhte haiṅ, “kaun sunegā?”
8lekin tū ai rabb, un par haṅstā hai, tū tamām qaumoṅ kā mazāq uṛātā hai.
9ai merī quvvat, merī āṅkheṅ tujh par lagī raheṅgī, kyūṅki allāh merā qil’ā hai.
10merā ḵẖudā apnī meharbānī ke sāth mujh se milne āegā, allāh baḵẖsh degā ki maiṅ apne dushmanoṅ kī shikast dekh kar ḵẖush hūṅgā.
11ai allāh hamārī ḍhāl, unheṅ halāk na kar, varnā merī qaum terā kām bhūl jāegī. apnī qudrat kā izhār yūṅ kar ki vah idhar udhar laṛakhṛā kar gir jāeṅ.
12jo kuchh bhī un ke muṅh se nikaltā hai vah gunāh hai, vah lānteṅ aur jhūṭ hī sunāte haiṅ. chunāṅche unheṅ un ke takabbur ke jāl meṅ phaṅsne de.
13ġusse meṅ unheṅ tabāh kar! unheṅ yūṅ tabāh kar ki un kā nām-o-nishān tak na rahe. tab log duniyā kī intihā tak jān leṅge ki allāh yāqūb kī aulād par hukūmat kartā hai. (silāh)
14har shām ko vah vāpas ā jāte aur kuttoṅ kī tarah bhauṅkte hue shahar kī galiyoṅ meṅ ghūmte phirte haiṅ.
15vah idhar udhar gasht lagā kar khāne kī chīzeṅ ḍhūṅḍte haiṅ. agar peṭ na bhare to ġurrāte rahate haiṅ.
16lekin maiṅ terī qudrat kī madahsarāī karūṅgā, subah ko ḵẖushī ke nāre lagā kar terī shafqat kī sitāish karūṅgā. kyūṅki tū merā qil’ā aur musībat ke vaqt merī panāhgāh hai.
17ai merī quvvat, maiṅ terī madahsarāī karūṅgā, kyūṅki allāh merā qil’ā aur merā meharbān ḵẖudā hai.