Zabūr 60
mardūd qaum kī duā
1dāūd kā zabūr. tarz : ahd kā sosan. tālīm ke liye yah sunaharā gīt us vaqt se mutālliq hai jab dāūd ne masoputāmiyā ke arāmiyoṅ aur zobāh ke arāmiyoṅ se jaṅg kī. vāpsī par yoāb ne namak kī vādī meṅ 12,000 adomiyoṅ ko mār ḍālā.
ai allāh, tū ne hameṅ radd kiyā, hamārī qil’ābandī meṅ raḵẖnā ḍāl diyā hai. lekin ab apne ġazab se bāz ā kar hameṅ bahāl kar.
2tū ne zamīn ko aise jhaṭke die ki us meṅ darāṛeṅ paṛ gaīṅ. ab us ke shigāfoṅ ko shifā de, kyūṅki vah abhī tak tharathrā rahī hai.
3tū ne apnī qaum ko talḵẖ tajriboṅ se dochār hone diyā, hameṅ aisī tez mai pilā dī ki ham ḍagmagāne lage haiṅ.
4lekin jo terā ḵẖauf mānte haiṅ un ke liye tū ne jhaṅḍā gāṛ diyā jis ke ird-gird vah jamā ho kar tīroṅ se panāh le sakte haiṅ. (silāh)
5apne dahane hāth se madad karke merī sun tāki jo tujhe piyāre haiṅ vah najāt pāeṅ.
6allāh ne apne maqdis meṅ farmāyā hai, “maiṅ fatah manāte hue sikam ko taqsīm karūṅgā aur vādī-e-sukkāt ko nāp kar bāṅṭ dūṅgā.
7jiliād merā hai aur manassī merā hai. ifrāīm merā ḵẖod aur yahūdāh merā shāhī asā hai.
8moāb merā ġusal kā bartan hai, aur adom par maiṅ apnā jūtā phaiṅk dūṅgā. ai filistī mulk, mujhe dekh kar zordār nāre lagā!”
9kaun mujhe qil’āband shahar meṅ lāegā? kaun merī rāhanumāī karke mujhe adom tak pahuṅchāegā?
10ai allāh, tū hī yah kar saktā hai, go tū ne hameṅ radd kiyā hai. ai allāh, tū hamārī faujoṅ kā sāth nahīṅ detā jab vah laṛne ke liye nikaltī haiṅ.
11musībat meṅ hameṅ sahārā de, kyūṅki is vaqt insānī madad bekār hai.
12allāh ke sāth ham zabardast kām kareṅge, kyūṅki vahī hamāre dushmanoṅ ko kuchal degā.