Zabūr 61

dūr se daraḵẖwāst

¹dāūd kā zabūr. mūsīqī ke rāhanumā ke liye. tārdār sāz ke sāth gānā hai.

ai allāh, merī āh-o-zārī sun, merī duā par tavajjuh de.

²maiṅ tujhe duniyā kī intihā se pukār rahā hūṅ, kyūṅki merā dil niḍhāl ho gayā hai. merī rāhanumāī karke mujhe us chaṭān par pahuṅchā de jo mujh se buland hai.

³kyūṅki tū merī panāhgāh rahā hai, ek mazbūt burj jis meṅ maiṅ dushman se mahfūz hūṅ.

⁴maiṅ hameshā ke liye tere ḵẖaime meṅ rahanā, tere paroṅ tale panāh lenā chāhatā hūṅ. (silāh)

⁵kyūṅki ai allāh, tū ne merī mannatoṅ par dhyān diyā, tū ne mujhe vah mīrās baḵẖshī jo un sab ko miltī hai jo terā ḵẖauf mānte haiṅ.

⁶bādshāh ko umr kī darāzī baḵẖsh de. vah pusht-dar-pusht jītā rahe.

⁷vah hameshā tak allāh ke huzūr taḵẖtnashīn rahe. shafqat aur vafādārī us kī hifāzat kareṅ.

⁸tab maiṅ hameshā tak tere nām kī madahsarāī karūṅgā, roz-ba-roz apnī mannateṅ pūrī karūṅgā.