Zabūr 62

ḵẖāmoshī se allāh kā intizār kar

¹dāūd kā zabūr. mūsīqī ke rāhanumā ke liye. yadūtūn ke liye.

merī jān ḵẖāmoshī se allāh hī ke intizār meṅ hai. usī se mujhe madad miltī hai.

²vahī merī chaṭān, merī najāt aur merā qil’ā hai, is liye maiṅ ziyādā nahīṅ ḍagmagāūṅgā.

³tum kab tak us par hamlā karoge jo pahale hī jhukī huī dīvār kī mānind hai? tum sab kab tak use qatl karne par tule rahoge jo pahale hī girne vālī chārdīvārī jaisā hai?

⁴un ke mansūboṅ kā ek hī maqsad hai, ki use us ke ūṅche uhde se utāreṅ. unheṅ jhūṭ se mazā ātā hai. muṅh se vah barkat dete, lekin andar hī andar lānat karte haiṅ. (silāh)

⁵lekin tū ai merī jān, ḵẖāmoshī se allāh hī ke intizār meṅ rah. kyūṅki usī se mujhe ummīd hai.

⁶sirf vahī merī jān kī chaṭān, merī najāt aur merā qil’ā hai, is liye maiṅ nahīṅ ḍagmagāūṅgā.

⁷merī najāt aur izzat allāh par mabnī hai, vahī merī mahfūz chaṭān hai. allāh meṅ maiṅ panāh letā hūṅ.

⁸ai ummat, har vaqt us par bharosā rakh! us ke huzūr apne dil kā raṅj-o-alam pānī kī tarah uṅḍel de. allāh hī hamārī panāhgāh hai. (silāh)

⁹insān dam bhar kā hī hai, aur baṛe log fareb hī haiṅ. agar unheṅ tarāzū meṅ tolā jāe to mil kar un kā vazan ek phūṅk se bhī kam hai.

¹⁰zulm par etimād na karo, chorī karne par fuzūl ummīd na rakho. aur agar daulat baṛh jāe to tumhārā dil us se lipaṭ na jāe.

¹¹allāh ne ek bāt farmāī balki do bār maiṅ ne sunī hai ki allāh hī qādir hai.

¹²ai rabb, yaqīnan tū meharbān hai, kyūṅki tū har ek ko us ke āmāl kā badlā detā hai.