Zabūr 63
allāh ke liye ārzū
1dāūd kā zabūr. yah us vaqt se mutālliq hai jab vah yahūdāh ke registān meṅ thā.
ai allāh, tū merā ḵẖudā hai jise maiṅ ḍhūṅḍtā hūṅ. merī jān terī piyāsī hai, merā pūrā jism tere liye tarastā hai. maiṅ us ḵẖushk aur niḍhāl mulk kī mānind hūṅ jis meṅ pānī nahīṅ hai.
2chunāṅche maiṅ maqdis meṅ tujhe dekhne ke intizār meṅ rahā tāki terī qudrat aur jalāl kā mushāhadā karūṅ.
3kyūṅki terī shafqat zindagī se kahīṅ behatar hai, mere hoṅṭ terī madahsarāī kareṅge.
4chunāṅche maiṅ jīte jī terī sitāish karūṅgā, terā nām le kar apne hāth uṭhāūṅgā.
5merī jān umdā ġizā se ser ho jāegī, merā muṅh ḵẖushī ke nāre lagā kar terī hamd-o-sanā karegā.
6bistar par maiṅ tujhe yād kartā, pūrī rāt ke daurān tere bāre meṅ sochtā rahatā hūṅ.
7kyūṅki tū merī madad karne āyā, aur maiṅ tere paroṅ ke sāy meṅ ḵẖushī ke nāre lagātā hūṅ.
8merī jān tere sāth lipṭī rahatī, aur terā dahanā hāth mujhe saṁbhāltā hai.
9lekin jo merī jān lene par tule hue haiṅ vah tabāh ho jāeṅge, vah zamīn kī gaharāiyoṅ meṅ utar jāeṅge.
10unheṅ talvār ke havāle kiyā jāegā, aur vah gīdṛoṅ kī ḵẖurāk ban jāeṅge.
11lekin bādshāh allāh kī ḵẖushī manāegā. jo bhī allāh kī qasam khātā hai vah faḵẖar karegā, kyūṅki jhūṭ bolne vāloṅ ke muṅh band ho jāeṅge.