Zabūr 64

sharīat ke poshīdā hamloṅ se hifāzat kī duā

¹dāūd kā zabūr. mūsīqī ke rāhanumā ke liye.

ai allāh, sun jab maiṅ apnī āh-o-zārī pesh kartā hūṅ. merī zindagī dushman kī dahshat se mahfūz rakh.

²mujhe badam’āshoṅ kī sāzishoṅ se chhupāe rakh, un kī halchal se jo ġalat kām karte haiṅ.

³vah apnī zabān ko talvār kī tarah tez karte aur apne zaharīle alfāz ko tīroṅ kī tarah tayyār rakhte haiṅ

⁴tāki tāk meṅ baiṭh kar unheṅ bequsūr par chalāeṅ. vah achānak aur bebākī se unheṅ us par barsā dete haiṅ.

⁵vah burā kām karne meṅ ek dūsre kī hausalāafzāī karte, ek dūsre se mashvrā lete haiṅ ki ham apne phaṅde kis tarah chhupā kar lagāeṅ? vah kahate haiṅ, “yah kisī ko bhī nazar nahīṅ āeṅge.”

⁶vah baṛī bārīkī se bure mansūboṅ kī tayyāriyāṅ karte, phir kahate haiṅ, “chalo, bāt ban gaī hai, mansūbā soch-bichār ke bād tayyār huā hai.” yaqīnan insān ke bātin aur dil kī tah tak pahuṅchnā mushkil hī hai.

⁷lekin allāh un par tīr barasāegā, aur achānak hī vah zaḵẖmī ho jāeṅge.

⁸vah apnī hī zabān se ṭhokar khā kar gir jāeṅge. jo bhī unheṅ dekhegā vah “taubā taubā” kahegā.

⁹tab tamām log ḵẖauf khā kar kaheṅge, “allāh hī ne yah kiyā!” unheṅ samajh āegī ki yah usī kā kām hai.

¹⁰rāstbāz allāh kī ḵẖushī manā kar us meṅ panāh legā, aur jo dil se diyānatdār haiṅ vah sab faḵẖar kareṅge.