Zabūr 65
ruhānī aur jismānī barkatoṅ ke liye shukrguzārī
1dāūd kā zabūr. mūsīqī ke rāhanumā ke liye gīt.
ai allāh, tū hī is lāiq hai ki insān koh-e-siyyūn par ḵẖāmoshī se tere intizār meṅ rahe, terī tamjīd kare aur tere huzūr apnī mannateṅ pūrī kare.
2tū duāoṅ ko suntā hai, is liye tamām insān tere huzūr āte haiṅ.
3gunāh mujh par ġālib ā gae haiṅ, tū hī hamārī sarkash harkatoṅ ko muāf kar.
4mubārak hai vah jise tū chun kar qarīb āne detā hai, jo terī bārgāhoṅ meṅ bas saktā hai. baḵẖsh de ki ham tere ghar, terī muqaddas sukūnatgāh kī acchhī chīzoṅ se ser ho jāeṅ.
5ai hamārī najāt ke ḵẖudā, haibtanāk kāmoṅ se apnī rāstī qāim karke hamārī sun! kyūṅki tū zamīn kī tamām hudūd aur dūrdarāz samundaroṅ tak sab kī ummīd hai.
6tū apnī qudrat se pahāṛoṅ kī mazbūt bunyādeṅ ḍāltā aur quvvat se kamarbastā rahatā hai.
7tū mutlātim samundaroṅ ko thamā detā hai, tū un kī garajtī laharoṅ aur ummatoṅ kā shor-sharābā ḵẖatm kar detā hai.
8duniyā kī intihā ke bāshinde tere nishānāt se ḵẖauf khāte haiṅ, aur tū tulū-e-subah aur ġurūb-e-āftāb ko ḵẖushī manāne detā hai.
9tū zamīn kī dekh-bhāl karke use pānī kī kasrat aur zarḵẖezī se navāztā hai, chunāṅche allāh kī nadī pānī se bharī rahatī hai. zamīn ko yūṅ tayyār karke tū insān ko anāj kī acchhī fasal muhayyā kartā hai.
10tū khet kī reghāriyoṅ ko sharābor karke us ke ḍheloṅ ko hamvār kartā hai. tū bārish kī bauchhāṛoṅ se zamīn ko narm karke us kī fasloṅ ko barkat detā hai.
11tū sāl ko apnī bhalāī kā tāj pahanā detā hai, aur tere naqsh-e-qadam tel kī farāvānī se ṭapakte haiṅ.
12biyābān kī charāgāheṅ tel [a] lafzī tarjumā : charbī, jo farāvānī kā nishān thā. kī kasrat se ṭapaktī haiṅ, aur pahāṛiyāṅ bharpūr ḵẖushī se mulabbas ho jātī haiṅ.
13sabzāzār bheṛ-bakriyoṅ se ārāstā haiṅ, vādiyāṅ anāj se ḍhakī huī haiṅ. sab ḵẖushī ke nāre lagā rahe haiṅ, sab gīt gā rahe haiṅ